Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 165 Hüküm no: 168 Orijinal metin no: [40a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Paşa’nın kölesi Canfeda bt. Abdullah’ın müdebbere suretiyle âzat edilmiş olduğu Vech-i âtî üzre rikka inkıyâdı olan işbu uzun boylu kara gözlü ak benizli açık kaşlı Çerkesiyyetü’l-asl müslimetü’l-millet Canfedâ bt. Abdullah Dîvân-ı Hümâyûn’da meclis-i şer‘-i hatîrde Antab sancağında mutasarrıf iken taraf-ı Saltanat-ı aliyyeden katl olunan Halil Paşa b. ( )’ın zâhirde vâris-i ma‘rûfu olmayıp tereke-i müteveffâ-yı mezbûra ve merkūme Canfedâ’ya vaz‘-ı yed eden Mehmed Ağa b. ( ) mahzarında üzerine takrîr-i da‘vâ edip ben müteveffâ-yı mezbûr Halil Paşa’nın câriye-i memlûkesi ve rakīkası olup müteveffâ-yı mezkûr Halil Paşa vefâtından beş sene mukaddem hâl-i nefâz-ı tasarrufâtında beni tedbîr-i mutlak ile tedbîr edip ben müdebbere olup müteveffâ-yı mezkûrun fevtiyle ve terekesinin sülüsü kıymetime kâfî ve vâfî olmağla hâlâ hürre iken işbu emîn Mehmed Ağa beni istirkâk edip üzerime nâ-hak vaz‘-ı yed eylemişdir. Suâl olunup üzerimden yed-i tâlibesinin izâle ve sebîlim tahliye olunmasın taleb ederim dedikde gıbbe’s-suâl emîn-i mezkûr tedbîr-i mezkûru inkâr edicek, müdde‘iye-i mezkûrdan da‘vâ-yı meşrûhasını mübeyyin beyyine taleb olundukda udûl-i müslimînden Ahmed Çavuş b. Ahmed Çavuş b. Mehmed ve Süleyman Bey b. Hızır el-bevvâb nâm kimesneler Dîvân-ı Hümâyûn’da meclis-i şer‘-i hatîre li ecli’ş-şehâde hâzırân olup gıbbe’ş-şehâdet her biri şehâdet edip fi’l-hakīka Antab sancağına mutasarrıf iken katl olunan Halil Paşa b. ( ) vefât etmezden beş sene mukaddem hâl-i nefâz-ı tasarrufâtında işbu müdde‘iye Canfedâ-yı tedbîr-i mutlak ile tedbîr eyledi. Hâlâ mezkûr Halil Paşa fevt olup terekesinin sülüsü işbu Canfedâ’nın kıymetine vâfîdir ve bu vechile işbu müdde‘î hürdür. Biz bu husûsa şâhidleriz şehâdet dahi ederiz deyû her biri münkir-i mezbûr muvâcehesinde edâ-i şehâdet-i şer‘iyye eylediklerinde gıbbe ri‘âyeti şerâyiti’l-kabûl şehâdetleri makbûle oldukdan sonra şehâdet-i mezbûre mûcebince mezbûr Canfedâ’nın ıtkına ve emîn-i mezkûrun kasr-ı yedine hükm olunup mâ vaka‘a ketb olundu. Fi’l-yevmi’t-târihi’l-mezbûr. Şuhûdü’l-hâl: es-Sâbıkūn.