Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 172 Hüküm no: 177 Orijinal metin no: [41b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nevcivan bt. Abdullah’ın, Mehmed Bey b. Mustafa aleyhindeki eşya davasında sulh olduğu Dârü’l-hilâfeti’l-aliyye mahmiye-i Kostantıniyye mahallâtından Sarı Bayezid mahallesinde sâkin Nevcivân bt. Abdullah meclis-i şer‘-i hatîr-i lâzımü’t-tevkīrde mahrûsa-i Mısır askerinden Mehmed Bey b. Mustafa nâm cündînin seyyibi olan işbu sâhibü’l-kitâb el-Hâc Vasıl b. Mehmed el-Mısrî mahzarında tav‘an ikrâr ve i‘tirâf edip işbu Mehmed Bey ikāmet-i sefer ile benim câr-ı mülâsıkım olup mezbûr Mehmed Bey tarafından olan dolabım yine mezbûr Mehmed Bey tarafından delinip yüz yirmi beşer riyâlî kuruşum ve bir sîm kemer raht kuşağım ve üç değirmî kilâbdân saçaklı altın makramam ve on dülbend yaşmakım ve bir dülbend baş makramam ve üç âl püsküllü yağlığım ve bir top mâ’î miskāli bogasim ve bir zenâne donum ve bir beyaz musli bogasim ve iki kilâbdân püsküllü serpûşum sirkat olmağla eşyâ-yı mezbûreyi mezbûr Mehmed Bey’e sen ahz eyledin deyû üzerine sulh olup bedel-i sulh-ı mezkûr Mehmed Bey yedinden ahz eylemişdir. Bu vechile el-Hâc Vasıl üzerine husûs-ı mezkûra müte‘allika bi vechin mine’l-vücûh da‘vâ ve hakkım yokdur dedikde mezkûr Mehmed Bey dahi tav‘an ikrâr edip ben dahi mezkûr el-Hâc Vasıl üzerine bi vechin mine’l-vücûh ve sebeben mine’l-esbâb da‘vâ ve hakkım yokdur dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’t-târihi’l-mezbûr sene 1059. Şuhûdü’l-hâl: Yusuf Beşe b. Abdullah, Yahya Bey b. Zekeriya, İsa Çelebi b. Ahmed, İsmail Bey b. Yunus.