Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 172 Hüküm no: 178 Orijinal metin no: [42a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hüseyin’in menzil arsasını Ebûbekir b. Hacı Mehmed’e sattığı Mahmiye-i İstanbul’da Kasab Timurhan mahallesinde sâkin fahrü’l-muhadderât Fâtıma Hâtun bt. merhûm Hüseyin Efendi tarafından ikrâr-ı âti’l-beyâna vekîl olup vekâleti mezbûreyi ma‘rifet-i şer‘iyye ile ârifân olan Mustafa Bey b. Mahmud ve Şaban Bey b. Ali şehâdetleri ile şer‘an sâbite olan Mustafa Çelebi b. Hamza meclis-i şer‘-i hatîr-i lâzımü’t-tevkīrde hâlâ Dîvân-ı Hümâyûn’da devâtdâr olan umdetü’l-emâcid ve’l-ekârim Ebûbekir Efendi b. el-Hâc Mehmed tarafından husûs-ı âti’l-beyâna evvelâ ikrâr ve tasdîka vekîl olup vekâleti bimâ hüve nehci’s-sübût şer‘an sâbite olan li ebeveyn karındaşı umdetü’l-a‘yân Mehmed Ağa mahzarında tav‘an bi’l-vekâle ikrâr ve i‘tirâf edip müvekkile-i mezbûre Fâtıma Hâtun zikri âtî akdin sudûruna değin yedinde ve taht-ı tasarrufunda mülk ve hakkı olup mahalle-i mezbûrede vâki‘ bir tarafı mûmâ-ileyh Ebûbekir Efendi mülküne ve bir tarafı dahi yine mezbûre Fâtıma Hâtun’un menzili bahçesine ve bir tarafı tarîk-i âmma müntehî tûlen ve arzan bi hesâb-ı terbî‘î yüz otuz altı zirâ‘ arsa-i hâliyesini kâffe-i hukūk ve mürâfıkı ile müvekkil-i mûmâ-ileyh Ebûbekir Efendi’ye fıddî râyic fi’l-vakt yüz altmış riyâlî kuruşa tarafeynden îcâb ve kabûlü hâvî şürût-ı müfsideden ârî bey‘-i bât ile bey‘ ve tesellüm edip ol dahi iştirâ ve teslîm eyledikden sonra semen-i mezkûr yüz altmış riyâlî müvekkil-i müşârun-ileyh müvekkilem mezbûr Fâtıma Hâtun’a teslîm edip ol dahi yedinden tamâmen ahz u kabz eyledi. Min ba‘d cemî‘ arsa-i mahdûde-i mezkûre mûmâ-ileyh Ebûbekir Efendi’nin mülk-i müşterâsı ve hakk-ı sırfıdır dedikde müvekkil-i mezbûrun vech-i meşrûh üzre cârî ve sâdır olan ikrârı vekîl-i mezbûr bi’l-muvâcehe tasdîk ve bi’l-müşâfehe tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Şaban Beşe b. İbrahim er-râcil, el-Hâc Pîrî b. Mehmed er-râcil, Mehmed Bey b. ( ), Mustafa Beşe b. er-râcil, Receb Beşe b. Abdülhay.