Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 173 Hüküm no: 179 Orijinal metin no: [42a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Hüseyin’in Çoban Cafer b. Memi Vakfı’ndan almış olduğu borç karşılığında bağını rehin verdiği Medîne-i Üsküdar nevâhîsinden Adalar nâhiyesine tâbi‘ Dolayoba nâm karyeden Ahmed Beşe b. Hüseyin nâm râcil meclis-i şer‘-i şerîfde nâhiye-i mezbûreye tâbi‘ Yakacık nâm karyede vâki‘ câmi‘-i şerîfin imâmı ve hatîbi olup merhûm Çoban Cafer b. Memi nâm sâhibü’l-hayrın nukūd-ı mevkūfesine meşrûtiyyet üzre mütevellî olan Mustafa Efendi b. Ali mahzarında tav‘an ikrâr ve i‘tirâf edip vakf-ı mezbûra cihet-i karz-ı şer‘îden dört bin cedîd râyic fi’l-vakt akçe deynim olduğundan gayrı semeni târih-i kitâbdan bir sene tamâmına değin müeccel mütevellî-i mezbûr yedinden müşterâ ve makbûzum olan bir mâ’î Londra çuka merdâne ferâce bahâsından dört yüz cedîd akçe cem‘an dört bin dört yüz cedîd akçe zimmetimde edâsı vâcib deynim olup meblağayn-i mezbûreyn dört bin dört yüz cedîd akçe deynim mukābelesinde yedimde mülk ve hakkım olup zikr olunan Dolayoba karyesinde İkizyeri nâm mevzi‘de vâki‘ bir tarafı Murat b. Abdullah bağına ve bir tarafı Mehmed Beşe b. Hacı bağına ve bir tarafı tarîk-i âmma müntehî cemî‘ bağımı cümle hukūkuyla mütevellî-i mezbûrun yedine rehin vaz‘ eyledim. Ol dahi irtihân ve kabûl ve tesellüm eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Rebî‘ulâhir li sene tis‘a ve hamsîn ve elf. Şuhûdü’l-hâl: Murtaza Beşe b. Mustafa, İbrahim b. Hasan, Mehmed b. Abdullah, Mehmed Odabaşı b. Mustafa, Mehmed Çelebi b. Mehmed, Veli b. Yusuf, İbrahim Beşe b. Mustafa, Yahya Bey b. Zekeriya.