Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 174 Hüküm no: 180 Orijinal metin no: [42a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Hüseyin’in Çoban Cafer b. Memi Vakfı’ndan aldığı borç karşılığında bağını rehin verdiği. Medîne-i Üsküdar nevâhîsinden Adalar nâhiyesine tâbi‘ Dolayoba nâm karyeden Ahmed Beşe b. Hüseyin nâm râcil meclis-i şer‘-i şerîfde vâki‘ câmi‘-i şerîfin müezzini olup merhûm Çoban Cafer b. Memi nâm sâhibü’l-hayrın nukūd-ı mevkūfesine meşrûtiyyet üzre mütevellî olan Ali Halîfe b. Mustafa mahzarında tav‘an ikrâr ve i‘tirâf, vakf-ı mezbûra cihet-i karz-ı şer‘îden dört bin cedîd akçe deynim olduğundan gayrı semeni târih-i kitâbdan bir sene tamâmına değin müeccel mütevellî-i mezbûr yedinden müşterâ ve makbûzum bir mâ’î Londra çuka bahâsından dört yüz cedîd akçe cem‘an dört bin dört yüz cedîd râyic fi’l-vakt akçe zimmetimde edâsı vâcib deynim olup meblağ-ı mezbûreyn dört bin dört yüz cedîd akçe deynim mukābelesinde yedimde mülküm ve hakkım olup karye-i mezbûre kurbunda Harmanyeri nâm mevzi‘de vâki‘ bir tarafı kendi mülküme ve bir tarafı Rüstem Beşe b. Abdullah bağına ve bir tarafı Mehmed Beşe b. Hayâlî bahçesine ve bir tarafı tarîk-i âmma müntehî cemî‘ bağımı cümle hukūkuyla mütevellî-i mezbûrun yedine rehin vaz‘ eyledim. Ol dahi irtihân ve kabûl ve tesellüm eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min şehri Rebî‘ulâhir li sene tis‘a ve hamsîn ve elf. Şuhûdü’l-hâl: es-Sâbıkūn.