Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 174 Hüküm no: 181 Orijinal metin no: [42b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kazasker Mehmed Efendi’nin Atâullâh Çelebi’nin para vakfına olan borcunu ödediği Mahmiye-i İstanbul’da Kâtib Hüsrev mahallesinde sâkin olup kendi vakfı olan nukūda şartı üzre mütevellî olan Atâullâh Çelebi b. Mustafa meclis-i şer‘-i hatîr-i lâzımü’t-tevkīrde bi’l-fi‘l Anadolu Kazaskeri olan sadru’l-ulemâi’l-izâm bedrü’l-fuzalâi’l-fihâm yenbû‘ü’l-fezâ’il metbû‘ü’l-efâzıl keşşâfü’l-müşkilâti’d-dîniyye hallâlü’l-mu‘dilâti’l-yakīniyye alemü’l-ilm ve’l-hüdâ menârü’l-fazl ve’t-tukâ el-mahfûf bi suhûfi avâtıfi’l-meliki’l-mu‘în Ebü’l-irşâd Mehmed Efendi b. Ali taraf-ı karîni’ş-şereflerinden ikrâr-ı âti’l-beyânı tasdîka vekîl olup vekâleti bimâ-hüve nehcü’s-sübût şer‘an sâbite olan Cafer Efendi b. Şaban mahzarında tav‘an ikrâr ve i‘tirâf edip vakf-ı mezbûr malından ba‘de küllî hesâb sadr-ı bülend maka fezâyil-küster-i mûmâ-ileyh Mehmed Efendi hazretleri zimmetinde otuz bin cedîd râyic fi’l-vakt akçeyi tevliyetim hasebiyle yedlerinden tamâmen alıp kabz eyledim. Min ba‘d târih-i kitâba gelince mûmâ-ileyh Mehmed Efendi hazretlerinin zimmetinde asl-ı mâl ve murâbaha-i vakf-ı mezbûrdan bir akçe bâkī kalmadığından gayrı benim dahi mûmâ-ileyh Mehmed Efendi hazretlerinin zimmetinde bir akçe ve bir habbe hakkım yokdur dedikde mukırr-ı merkūm Atâullâh Çelebi minvâl-i meşrûh üzre sâdır olan ikrârında vekîl-i mezbûr Cafer Efendi vicâhen tasdîk ve şifâhen tahkīk eylemeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Fahrü’l-müderrisîn Hüseyin Efendi, Mustafa Efendi b. Eyyûb el-kadı, es-Seyyid Emrullah Efendi b. es-Seyyid Halil, Osman Efendi b. el-Hatîb, Abdülvehhâb Efendi b. Abdüllatif rûznâmeci, Mehmed Efendi b. Mahmud el-kadı, Mehmed Efendi b. el-Hâc Bektaş el-kadı, Musa Efendi [b.] el-Hâc Mustafa.