Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 175 Hüküm no: 182 Orijinal metin no: [42b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâime Hâtun bt. Mustafa’nın arsasını damadı Süleyman Beşe b. Abdullah’a sattığı Mahmiye-i İstanbul’da Nişancı Paşa-yı Atîk mahallesinde sâkine Sâime Hâtun bt. Mustafa meclis-i şer‘-i hatîr-i lâzımü’t-tevkīrde dâmâdı işbu râfi‘ül-kitâb Süleyman Beşe b. Abdullah nâm râcil mahzarında tav‘an ikrâr ve i‘tirâf edip işbu akdin sudûruna değin silk-i mülkümde münselik ve yedimde hakkım olup mahalle-i mezbûrede vâki‘ bir tarafı İshak Bey b. ( ) mülküne ve bir tarafı Ali Çavuş mülküne ve bir tarafı Ali Çelebi b. Murat mülküne ve bir tarafı tarîki âmma müntehî tûlen ve arzan bi hesâb-ı şatrancî dört yüz kırk ve zirâ‘ cemî‘ arsamı âmme-i hukūkuyla dâmâdım mezkûr Süleyman Beşe’ye yirmi beş bin beş yüz fıddî râyic fi’l-vakt akçeye tarafeynden îcâb ve kabûlü hâvî ve şürût-ı müfsid-i ârîden bey‘-i bâtla bey‘ ve teslîm edip ol dahi iştirâ ve tesellüm eyledikden sonra semen-i merkūm yirmi beş bin beş yüz akçeyi müşterî-i merkūm Süleyman Beşe yedinden tamâmen alıp kabz eyledim. Ba‘de’l-yevm arsa-i mezbûre merkūm Süleyman Beşe’nin mülk-i müşterâsıdır. Keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Mustafa Efendi b. Mehmed el-imâm, Ömer Efendi b. Fazlullah, Mehmed Çelebi b. Sefer, es-Seyyid Mehmed b. Ahmed, Abdullah Efendi b. Sinan, Ahmed b. Mehmed, Osman b. Abdullah, İbrahim b. Ali.