Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 176 Hüküm no: 183 Orijinal metin no: [42b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Abdullah’ın kölesi Mülayim’i boşandığı eşi Ayşe bt. Mehmed’e sattığı bedelinin bir kısmını mehir borcuyla takas ettiği kalanını havâle yaptığı Mahmiye-i İstanbul’da Mimar Ayas mahallesinde sâkin Ahmed Beşe b. Abdullah meclis-i şer‘-i hatîr-i lâzımü’t-tevkīrde zevce-i mutallakası işbu râfi‘atü’l-kitâb Ayşe bt. Mehmed mahzarında bi’t-tav‘i’s-sâf ikrâr ve i‘tirâf edip zikri âtî akdin sudûruna değin silk-i mülk ve yedimde münselik işbu açık kaşlı kara gözlü esmerü’l-levn Gürciyyetü’l-asl müslimetü’l-millet Mülayim nâm câriye memlûkemi merkūme Ayşe’ye yedi bin iki yüz fıddî râyic fi’l-vakt akçeye bâtten bey‘ ve teslîm edip ol dahi minvâl-i meşrûh üzre iştirâ ve tesellüm kabûl eyledikden sonra semen-i mezbûrdan dört bin akçesini mezbûre Ayşe Hâtun’un zimmetimde nikâhı ma‘kūd olan dört bin akçeyi takās eylediğimden sonra meblağ-ı bâkī üç bin iki yüz akçenin dahi iki bin akçesine işbu hâzır bi’l-meclis Ahmed b. Mehmed’e zimmetimde deyn olan akçesi ile mezbûr Ahmed Çelebi’yi mezbûre Ayşe üzerine cümlemiz rızâlarıyla havâle-i sahîha-i şer‘iyye ile havâle eyledim dedikde mezbûr Ahmed Çelebi dahi havâle-i mezkûreyi kabûl edip mezbûre zimmetinde semen-i mezkûrdan bâkī ancak bin iki yüz akçe hakkım kalmışdır dedikde mukırr-ı mezbûru ikrâr-ı meşrûhunda el-mukarrun lehâ’l-merkūme Ayşe vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-târihi’l-mezbûr sene 1059. Şuhûdü’l-hâl: Ramazan Bey b. Abdullah, Ahmed Beşe b. Abdullah, Mehmed Çavuş b. Resûl, Mustafa Çelebi b. ( ), Yahya Bey [b.] Zekeriya.