Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 178 Hüküm no: 185 Orijinal metin no: [43a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mustafa b. İsmail’in vârislerinin kefaletten dolayı Tatol ve Agob’da olan alacaklarının tahsil edildiği Mahmiye-i İstanbul’da Hoca Üveys mahallesinde sâkin iken vefât eden Mustafa b. İsmail’in verâseti vâlidesi Sâime Hâtun bt. Abdullah ile li üm karındaşları Abdurrahman ve Ümmühâni ve Rahime nâm sagīrlere münhasıra olduğu şer‘an mütehakkık oldukdan sonra sıgār-ı mezbûrûnun tesviye-i umûrlarına kıbel-i şer‘den mansûb vasîleri olup mezbûre Sâime Hâtun tarafından dahi husûs-ı âti’l-beyâna sâbitü’l-vekâle vekîl olan sıgār-ı mezbûrûnun babaları ve mezbûre Sâime Hâtun’un zevci el-Hâc Murad b. Mehmed nâm râcil meclis-i şer‘-i hatîrde işbu sâhibü’l-kitâb Agob v. Badem ve Tatol v. Paruh nâm Ermeni zimmîler mahzarlarında tav‘an ikrâr ve i‘tirâf edip mezbûre Sâime Hâtun ile sıgār-ı mezbûrun mûrisleri müteveffâ-yı mezbûr Mustafa’dan irs-i şer‘î ile intikāl eden mallarından mezbûre Agob ve Tatol ile gāibûn ani’l-meclis Ahmed b. Abdullah nâm kimesne ile Kesteb v. Arslan ve Çaçok v. Palo ve İskender v. Banar? ve Ferahrad? v. Sarkiz ve Selobar? v. Sarkiz nâm zimmîler zimmetlerinde cihet-i karz-ı şer‘îden mezbûrûndan her biri âharın zimmetine edâsı lâzım gelen meblağın cümlesine tarafından emir ve kabûlü hâviye kefâlet-i sahîha-i şer‘iyye ile kefîl olmalarıyla meblağ-ı mezbûru’n-na‘t dokuz yüz riyâlî kuruşun bi hükmi’l-kefâle ve’l-asâle işbu Agob ve Tatol üzerlerine edâsına hükm-i şer‘î [43b] bi’d-defe‘ât bana def‘ ve teslîm edip ben dahi vekâlet ve vesâyetim hasebiyle ahz u kabz eyledim. Min ba‘d meblağ-ı mezbûr dokuz riyâlî kuruşdan verese-i mezkûrûnun mezbûrûn üzerlerinde bir habbe hakları kalmayıp zimmetleri berî olmuşdur dedikde mukırr-ı mezbûrun vekâleten ve vesâyeten cârî ve sâdır olan ikrârı mezbûrân Agob ve Tatol bi’l-muvâcehe tasdîk ve bi’l-müşâfehe tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: El-Hâc Mustafa b. Mehmed Semerci, Mustafa b. Mehmed Semerci, Ahmed Çelebi b. Bâli, Ömer Çelebi b. Mehmed, el-Hâc Osman b. Mehmed, Hüseyin b. Süleyman, Abdurrahman b. Abdullah, Arslan b. Hasan el-Muhzır.