Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 179 Hüküm no: 186 Orijinal metin no: [43b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Reftar bt. Abdullah’ın vefat eden kuyumcu Hüseyin Çelebi’nin kendisine intikal eden mesleğiyle ilgili bazı eşyaları Mehmed Çelebi b. İsmail’e sattığı Mahmiye-i İstanbul’da Küçük Karaman kurbunda el-Hâc İlyas mahallesinde sâkin iken bundan akdem vefât eden zerkûb Hüseyin Çelebi b. Abdullah’ın zevce-i metrûkesi ve vârisesi olan Reftar Hâtun bt. Abdullah tarafından ikrâr-ı âti’l-beyâna vekîl olup vekâleti mahalle-i mezbûreden olup mezbûreleri ma‘rifet-i şer‘ ile ârifân olan vezneci Mustafa Beşe b. Mehmed ve bıçkıcı Ahmed Beşe b. Himmet şehâdetleriyle şer‘an sâbite olan zerkûb Mustafa Beşe b. Receb meclis-i şer‘-i hatîr-i lâzım-ı tevkīrde işbu râfi‘ül-kitâb Mehmed Çelebi b. İsmail tarafından ikrâr-ı âti’l-beyânı tasdîka vekîl olup vekâleti bimâ-hüve nehcü’s-sübût şer‘an sâbite olan Mustafa Odabaşı b. Ahmed mahzarında tav‘an bi’l-vekâle ikrâr edip müvekkilem mezbûre Reftâre Hâtun zevci müteveffâ-yı mezkûr terekesinden mehr-i müsbeti ve sâyir hakkı mukābelesinde ahz ve kabz eyleyip zikri âtî akdin sudûruna değin yedinde ve taht-ı tasarrufunda mülk hakkı olup bir altın tümeni ve bir gümüş tümeni ve bir orta şeber ve bir gümüş orta tepsi ve bir ibrik nâm âlâtı ve bir cam çerçevesini ve yedi aded düğme taşını ve on aded zerkûb ve çekecini ve beş aded seyf? nâm elriz? ve çinili çekmece ve üç mikrâz ve beş aded kürsisini mezbûr Mehmed Çelebi’ye beş bin cedîd râyic fi’l-vakt akçeye tarafeynden îcâb ve kabûlü bey‘-i kat‘î ile bi safka-i vâhide bey‘ ve teslîm edip ol dahi nefsiyçün iştirâ ve tesellüm eyleyip, semen-i mezkûr beş bin akçeyi tamâmen mezbûr Mehmed Çelebi yedinden ahz u kabz eyledi. Min ba‘d eşyâ-yı mezkûre mezbûr Mehmed Çelebi’nin mülk-i müşterâsı ve hakk-ı sırfıdır dedikde vekîl-i mezbûr zerkûb Mustafa’yı ikrâr-ı meşrûhunda vekîl-i merkūm Mustafa Odabaşı vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’l-ışrîn min şehr-i Rebî‘ulâhir li sene tis‘a ve hamsîn ve elf. Şuhûdü’l-hâl: Mustafa Beşe b. Ali er-râcil, Mehmed Çelebi b. Yakub, Mehmed Beşe b. Hüseyin, Ali Beşe b. Hasan er-râcil, Mustafa Beşe b. Bâli, İsa Bey b. Ahmed.