Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 179 Hüküm no: 187 Orijinal metin no: [43b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abide bt. Hüseyin’in vakıf bina ve arsasını Mehmed Efendi b. Ömer’e sattığı Husûs-ı âti’l-beyânın mahallinde tahrîri iltimâs olunmağın savb-ı şer‘den Mevlânâ Ahmed Efendi b. Abdülbâkī Efendi irsâl, ol dahi mahmiye-i İstanbul’da Uzun Şücâ‘ mahallesinde sâkine Abide Hâtun bt. Hüseyin’in menziline varıp zeyl-i kitâbda mastûrü’l-esâmî müslimîn huzûrunda akd-i meclis eyledikde merkūme Abide Hâtun meclis-i mezbûrda mukābele piyâde halîfelerinden fahr-ı erbâbü’t-tahrîr ve’l-kalem Mehmed Efendi b. Ömer mahzarında bi tav‘ihâ ikrâr ve i‘tirâf edip merhûm Ali Paşa Vakfı’na senede yirmi beş akçe mukāta‘a ve ma‘rifet-i mütevellî ile zikri âtî akdin sudûruna değin taht-ı tasarrufumda mülk ve hakkım olup mahalle-i mezbûrede vâki‘ bir tarafı Fahri Efendi veresesi tasarrufunda olan vakıf menzile ve bir tarafı Sakine bt. Mehmed Ağa mülküne ve bir tarafı Ayşe Hâtun bt. Mehmed Ağa mülküne ve bir tarafı tarîk-i hâssa müntehî arsa üzerinde vâki‘ bir tahtânî ve bir bâb fevkānî odaları ve tahtapûş ve mahzeni ve bi’r-i mâyı ve kenîfi müştemil cemî‘ ebniye-i memlûkemi kâffe-i hukūkuyla merkūm Mehmed Efendi’ye on bin fıddî râyic fi’l-vakt akçeye bey‘-i bâtt-ı sahîh ile bey‘ ve teslîm ve arsa-i mezbûreyi dahi mütevellî-i vakf-ı mezbûr ma‘rifetiyle tefvîz ve teslîm eyledim. Ol dahi iştirâ ve tefevvüz ve tesellüm ve kabûl eyledikden sonra semeni olup mezbûr Mehmed Efendi zimmetinde olan meblağ-ı mezkûr on bin akçeyi yine merkūm Mehmed Efendi’ye hibe-i sahîh-i şer‘iyye ile hibe eyledim. Ol dahi minvâl-i muharrer üzre ittihâb ve kabûl edip min ba‘d cemî‘ müştemilât-ı memlûke-i [44a] meşrûha mezbûr Mehmed Efendi’nin mülkü ve hakkıdır ve arsa-i mezbûre dahi hakk-ı makbûzudur. Benim cemî‘ menzil-i mezkûrda ve semeninde bi vechin mine’l-vücûh hakkım kalmadı dedikde mukırra-i mezbûreyi ikrâr-ı meşrûhunda el-mukarru lehü’l-merkūm Mehmed Efendi vicâhen tasdîk ve şifâhen tahkīk eylediğini mevlânâ-yı mezbûr mahallinde tahrîr ba‘dehû meclis-i şer‘-i hatîre gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Hurrire fi’l-yevmi’l-ışrîn min şehri Rebî‘ulâhir sene 1059. Şuhûdü’l-hâl: El-Hâc Habib b. Hacı, Musli Çelebi b. Mustafa, el-Hâc Oruc b. Osman, Ahmed Beşe b. İbrahim, el-Hâc Yusuf b. Abdullah, Mehmed Beşe b. Nurullah, Abdurrahman Bey b. Salih, Mehmed b. Mehmed.