Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 180 Hüküm no: 188 Orijinal metin no: [44a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abide bt. Hüseyin’in vakıf bina ve arsasını Nazenin bt. Abdullah’a sattığı Husûs-ı âti’l-beyânın mahallinde tahrîri iltimâs olunmağın savb-ı şer‘den Mevlânâ Ahmed Efendi b. Abdülbâkī Efendi irsâl olunup ol dahi mahmiye-i İstanbul’da Uzun Şücâ‘ mahallesinde sâkine Abide Hâtun bt. Hüseyin’in menziline varıp zeyl-i kitâbda mastûrü’l-esâmî müslimîn huzûrunda akd-i meclis eyledikde mezbûre Abide Hâtun meclis-i mezbûrda mu‘taka Nazenîn bt. Abdullah mahzarında tav‘an ikrâr ve i‘tirâf edip merhûm Ali Paşa Vakfı’na senede mukāta‘a-i ma‘lûme ve ma‘rifet-i mütevellî ile zikri âtî akdin sudûruna değin taht-ı tasarrufumda mülk ve hakkım olup mahalle-i mezbûrede vâki‘ bir tarafı Fahri Efendi veresesi tasarrufunda olan vakıf menziline ve iki tarafı Mehmed Efendi b. Ömer menziline ve bir tarafı tarîk-i hâssa müntehî arsa üzerinde vâki‘ bir bâb fevkānî odayı müştemil ebniye-i memlûkemi kâffe-i hukūkuyla merkūme Nâzenîn’e iki bin fıddî râyic fi’l-vakt akçeye bey‘-i bâtt-ı sahîh ile bey‘ ve teslîm ve arsa-i mezbûreyi dahi mütevellî-i vakf-ı mezbûr ma‘rifetiyle tevfîz ve tesellüm eyledim, ol dahi iştirâ ve tesellüm ve tefevvüz ve kabûl eyledikden sonra semeni olup mezbûre Nazenîn zimmetinde olan meblağ-ı mezbûr iki bin akçeyi yine merkūme Nazenîn’e hibe-i sahîha-i şer‘iyye ile hibe eyledim, ol dahi minvâl-i muharrer üzre ittihâb ve kabûl edip min ba‘d cemî‘ müştemilât-ı memlûke-i meşrûha mezbûre Nazenîn’in mülkü ve hakkıdır ve arsa-i mezbûre dahi hakk-ı müfevvezidir. Benim cemî‘ menzil-i mezkûrda ve semeninde bi vechin mine’l-vücûh hakkım kalmadı dedikde, mukırra-i mezbûreyi ikrâr-ı meşrûhasında el-mukarru lehâ’l-merkūme vicâhen tasdîk ve şifâhen tahkīk edicek, Mevlânâ-yı mezbûr mahallinde tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Hurrire fi’l-yevmi’l-ışrîn min şehri Rebî‘ulâhir sene 1059. Şuhûdü’l-hâl: es-Sâbıkūn.