Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 181 Hüküm no: 189 Orijinal metin no: [44a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Paşa b. Rüstem’in vârislerinden Asiye Hanım’ın menzil hissesini diğer vâris Saliha Hanım’a, Saliha Hanım’ın da Kayseri’de olan menzil, bağ ve değirmen hisselerini Asiye Hanım’a sattıkları Mahmiye-i İstanbul’da Saraç İshak mahallesinde sâkin iken bundan akdem Mısır-ı Kahire’den ma‘zûlen katl olunan Ahmed Paşa b. Rüstem Bey’in verâseti zevce-i metrûkesi ( ) Hâtun bt. ( ) ve sulbiye kebîre kızları Saliha Hanım ve Hümâşah Hanım’a ve vâlidesi Şehriban Hâtun bt. el-Hâc Himmet’e ve li ebeveyn kız karındaşları Ayşe Hâtun’a ve Asiye Hâtun’a münhasıra olup kable’l-kısme mezbûre Hümâşah Hanım dahi vefât edip verâseti vâlidesi Behzad Hâtun bt. Abdullah’a ve li eb kız karındaşı mezbûre Saliha Hanım’a ve li üm er karındaşları Mehmed Çelebi ve Mustafa Çelebi ibney el-Hâc Ahmed Efendi’ye münhasıra olup kable’l-kısme mezbûr Mehmed Çelebi dahi vefât edip verâseti vâlidesi mezbûre Behzad Hâtun’a ve babası merkūm Ahmed Efendi’ye münhasıra olup kable’l-kısme mezbûr Mustafa Çelebi dahi vefât edip verâseti vâlidesi mezbûre Behzad Hâtun’a ve babası merkūm Ahmed Efendi’ye münhasıra olup kable’l-kısme mezbûre Şehriban Hâtun dahi vefât edip verâseti sadriye kebîre kızları merkūmetân Ayşe Hâtun’a ve Asiye Hâtun’a ve li ebeveyn er karındaşı Ahmed Bey b. el-Hâc Himmet’e münhasıra olup kable’l-kısme mezbûre ayşe Hâtun dahi vefât edip verâseti zevc-i metrûku el-Hâc Mehmed Ağa b. el-Hâc Hasan’a ve sadrî kebîr oğlu Osman Çelebi’ye münhasıra olup tashîh-i meseleleri bin yedi yüz yirmi sekiz sehim i‘tibâr olunup sihâm-ı mezbûrûndan iki yüz on altı sehimi zevce-i mezkûre ( ) Hâtun’a ve sekiz yüz altmış dört sehimi dahi merkūme Saliha Hanım’a ve yüz altmış sehimi dahi merkūme Behzad Hâtun’a ve yüz yirmi sekiz sehimi dahi merkūm el-Hâc Ahmed Efendi’ye ve yüz otuz iki sehimi dahi merkūme Asiye Hâtun’a ve doksan altı sehimi dahi mezbûr Ahmed Bey’e ve otuz üç sehimi dahi mezbûr el-Hâc Mehmed Ağa’ya ve doksan dokuz sehimi dahi merkūm Osman Çelebi’ye [44b] isâbet eylediği şer‘an mütehakkık olmağla husûs-ı âti’l-beyânın mahallinde tahrîri iltimâs olunmağın savb-ı şer‘-i kavîmden Mevlânâ Ahmed Efendi b. Abdülbâkī Efendi irsâl olunup ol dahi mahalle-i mezbûrede vâki‘ bir tarafı Kaytas Ağa Vakfı’na ve bir tarafı Nişancı Mehmed Paşa Vakfı’na ve bir tarafı ba‘zan hakkâk odalarına ve ba‘zan Ayşe Hâtun mülküne ve ba‘zan Acem Mehmed Çavuş mülküne ve bir tarafı ba‘zan Devâtdâr Mehmed Çelebi mülküne ve ba‘zan tarîk-i âmma müntehî olup müteveffâ-yı evvel-i mezkûr ahmed Paşa’nın terekesinden olan menzile varıp zeyl-i kitâbda mastûrü’l-esâmî müslimîn huzûrunda akd-i meclis eyledikde merkūme Asiye Hâtun’un zevci ve tarafından husûs-ı âti’l-beyâna vekîli olup vekâleti mezbûreyi ma‘rifet-i şer‘iyye ile ârifân olan Ahmed Çavuş b. Derviş, Mehmed Çavuş ve el-Hâc Mustafa Ağa b. Abdullah şehâdetleriyle şer‘an sâbite olan Ali Ağa b. Abdullah meclis-i mezbûrda mûmâ-ileyhâ Saliha Hanım tarafından kezâlik husûs-ı âti’l-beyâna vekîl olup bimâ-hüve nehcü’s-sübût şer‘an vekâleti sâbite olan zevci umdetü’l-emâcid ve’l-ekârim Yavaşça Ali Ağa b. Hüseyin mahzarında bi’l-vekâle tav‘an ikrâr ve i‘tirâf edip işbu akd-i meclis olup hudûd-ı mezkûr ile mahdûd olan cemî‘ menzil müteveffâ-yı evvel olan mezkûr Ahmed Paşa’nın terekesinden olup menzil-i mezkûrda bi hesâbi’l-münâsahati’l-mezbûre müvekkilem mezbûre Asiye Hâtun’a isâbet eden yüz otuz iki sehim hisse-i şer‘iyye-i şâyi‘asını cemî‘ tevâbi‘ ve levâhıkı ile bi hükmi’l-vekâle müvekkile-i mûmâ-ileyhâ Saliha Hanım’a beş yüz elli kıt‘a riyâlî kuruşa bey‘-i bâtt-ı sahîh ile bey‘ ve teslîm edip ol dahi minvâl-i muharrer üzre iştirâ ve tesellüm ve kabûl eyledikden sonra semen-i mezbûr beş yüz elli kıt‘a riyâlî kuruşdan dört yüz riyâlî kuruşunu müvekkilem mezbûre için vekîl-i müşârun-ileyh Yavaşça Ali Ağa yedinden vekâletim hasebiyle ahz u kabz eylediğimden sonra semen-i bâkī-i mezbûr yüz elli riyâlî kuruşa dahi müvekkile-i mûmâ-ileyhâ yine müteveffâ-yı evvel Ahmed Paşa’nın terekesinden olup vilâyet-i Anadolu’da Kayseriye kazâsına tâ[bi‘] Molu nâm karye vâki‘ bir tarafı el-Hâc Ali b. ( ) mülküne ve bir tarafı Hüsrev b. ( ) mülküne ve bir tarafı Bekir Beşe b. ( ) mülküne ve bir tarafı tarîk-i âmma müntehî mülk menzilin ve yine karye-i mezbûre bağları hilâlinde vâki‘ Ahmed Paşa bağı dimekle ma‘rûf lede’l-ahâlî ma‘lûmü’l-hudûd üç kıt‘a bağın ve yine Karasu dimekle ma‘rûf nehir üzerinde dâyir lede’l-ahâlî ma‘lûmü’l-hudûd bir göz un değirmeninin üç sehimden bir sehm-i şâyi‘i müteveffâ-yı mezbûr Ahmed Paşa’nın terekesinden olmağla zikr olunan sülüs sehm-i şâyi‘in bi hesâbi’l-münâsahati’l-mezbûre müvekkile-i müşârun-ileyhâya isâbet ve intikāl eden sekiz yüz altmış dört sehim hisse-i şer‘iyye-i şâyi‘asından dört yüz otuz iki sehm-i şâyi‘ini cemî‘ tevâbi‘ ve levâhıkı ile be safka-i vâhide müvekkilem mezbûre için bana yüz elli riyâlî kuruşa bâtten bey‘ ve teslîm edip ben dahi minvâl-i muharrer üzre bi hükmi’l-vekâlet iştirâ ve kabûl eylediğimden sonra semen-i mezbûr yüz elli riyâlî kuruşu müvekkile-i mûmâ-ileyhâ zimmetinde bâkī kalan meblağ-ı mezbûr yüz elli riyâlî kuruşa takās eyledim min ba‘d menzil-i mahdûd-ı mezbûre müvekkilem mezbûre Asiye Hâtun’un sehm-i mezkûru olan yüz otuz iki sehm-i şâyi‘i müvekkile-i mezkûre Saliha Hanım’ın mülk-i müşterâsı ve hakk-ı sırfıdır. Müvekkilem mezbûrenin bi vechin mine’l-vücûh alâka ve hakkı kalmadı ve müvekkile-i mezkûre Saliha Hâtun dahi Molu karyesinde olan menzil ve bağlar ve değirmende mebî‘ olan dört yüz otuz iki sehm-i şâyi‘i kabza müvekkilem mezbûreyi taslît eyledi dedikde vekîl-i mezbûr Yavaşa Ali Ağa dahi müvekkilem mezbûre Saliha Hanım’ın zikr olunan Molu karyesinde olan menzilden ve bağlardan ve değirmenden bi hesâbi’l-münâsahati’l-mezbûre sekiz yüz altmış sehimden müvekkilem mezbûrun vekîli Ali Ağa’ya vech-i meşrûh üzre bey‘ eyleyip semeni olan yüz elli riyâlî kuruşa vech-i mezkûr üzre takās eylediği dört yüz otuz iki sehm-i işbu Ali Ağa’nın müvekkilesi merkūme Asiye Hâtun’un mülk-i müşterâsıdır. Müvekkilem mezbûre Saliha Hanım’ın mebî‘ olan sihâm-ı mezkûre dört yüz otuz iki sehimde hakkı kalmadı dedikde gıbbe’t-tasdîki’ş-şer‘î mevlânâ-yı mezbûr mahallinde tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin [45a] mâ vaka‘a bi’t-taleb ketb olundu. Hurrire fi’l-yevmi’s-sâdis min şehri Rebî‘ulâhir sene 1059. Şuhûdü’l-hâl: İbrahim Ağa b. Mehmed, Hüseyin Ağa b. Mehmed, el-Hâc Receb Ağa b. Ömer, Musa Çavuş b. İbrahim, Mustafa b. Süleyman, Mahmud Ağa b. Mustafa, Şaban Ağa b. Mustafa, Kasım Beşe b. Ahmed, Osman b. Hüseyin.