Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 191 Hüküm no: 200 Orijinal metin no: [47a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sefer Beşe b. Ahmed sahip olduğu iş yeri hissesini Mardiros ve İsak ve Hazaran’a sattığı Pınarhisar kazâsına tâbi‘ Ören nâm karyeden Sefer Beşe b. Ahmed meclis-i şer‘-i hatîrde işbu râfi‘atü’l-kitâb Mardiros v. Murad ve İsak v. Ferhad ve Hazaras v. Mardiros mahzarlarında bi’t-tav‘i’s-sâf ikrâr ve i‘tirâf edip mahmiye-i İstanbul’da Araba Meydanı kurbunda bir tarafı Gümrük Emîni Ali Ağa mülküne ve bir tarafı tasarrufunda olan ekmekçi fırınına ve bir tarafı Reiszâde Ahmed Çelebi mülküne ve bir tarafı tarîk-i âmma müntehî harâb uncu kârhânesinde vâki‘ seng deyrinin? ve bir re’s bârgirin ve bir çukur yağlı kirecin nısf gemi toz kirecin ve sekiz aded sagīr fıçının altı sehimden bir sehm-i şâyi‘i benim mülk ve hakkım olmağla hâlâ zikr olunan altı sehimden bir sehim hisse-i şer‘iyye-i şâyi‘amı cemî‘ hukūkuyla bi safka-i vâhide merkūmûn Mardiros ve İsak ve Hazaran seksen kıt‘a riyâlî kuruşa bey‘-i bâtt-ı sahîh ile bey‘ ve teslîm edip onlar dahi vech-i muharrer üzre iştirâ ve tesellüm ve kabûl eylediklerinden sonra semen-i mezbûr seksen kıt‘a riyâlî kuruşu merkūmûn yedlerinden bi’t-tamâm ahz u kabz eyledim. Min ba‘d sâlifü’z-zikr seng deyrinin? ve bârgirin ve yağlı kireç ve toz kirecin ve fıçının altı sehimden bir sehm-i şâyi‘i merkūmûnun mülk-i müşterâları ve hakk-ı sırflarıdır benim bi vechin mine’l-vücûh alâkam kalmadı dedikde, mukırr-ı mezbûru ikrâr-ı meşrûhunda el-mukarru lehü’l-merkūmûn vicâhen tasdîk ve şifâhen tahkīk edicek, mâ hüve’l-vâki‘ bi’t-taleb olundu. Hurrire fi’l-yevmi’t-tâsi‘ aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Şaban Beşe b. Abdullah, Yahya Bey b. Zekeriya, İsmail Çelebi b. Yunus, Mustafa Çelebi b. Mehmed el-bâbü’s-sultânî?