Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 192 Hüküm no: 201 Orijinal metin no: 47b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihân Hâtun bt. Memişah’ın menzili ile bir takım kitaplarını ve mehr-i müeccelini eşi Mehmed Efendi b. Mustafa’ya hibe ettiği Dârü’l-hilâfeti’l-aliyye Kostantıniyyeti’l-mahmiye mahallâtından Beyceğiz mahallesi sâkinelerinden fahrü’l-muhadderât İsmihân Hâtun bt. Memişah tarafından ikrâr-ı âti’l-beyâna vekîl olup vekâleti mezbûreyi ma‘rifet-i şer‘iyye ile ârifeyn olan fahrü’l-kuzât Abdülbâkī Efendi b. Abdurrahman Efendi ve zahrü’l-vülât Kenan Efendi b. Abdülmennân şehâdetleri ile şer‘an sâbite olan fahrü’l-emâsil el-Hâc Abbas Bey b. İbrahim meclis-i şer‘-i hatîr-i lâzımü’t-tevkīrde müvekkile-i mezbûrenin hâlâ zevci olan eşbehü’l-kuzât Mehmed Efendi b. Mustafa mahzarında bi’t-tav‘i’s-sâf ikrâr ve i‘tirâf edip müvekkile-i mezbûre İsmihân Hâtun zikri âtî hibenin sudûruna değin yedinde ve taht-ı tasarrufunda mülk ve hakkı olup mahalle-i mezbûrede vâki‘ bir tarafı Hüseyin Ağa b. Emrullah mülküne ve bir tarafı ( ) Vakfı olan odalara ve bir tarafı ba‘zan hâlâ Lofça kadısı Mehmed Efendi b. Mustafa tasarrufunda olan vakıf menzile ve ba‘zan Ayşe Hâtun mülküne ve bir tarafı tarîk-i hâssa ve ba‘zan Mahmud Ağa veresesi mülküne muttasıl olup muhavvata-i dâhiliyesi üç bâb tahtânî odayı ve sofayı ve kenîfi ve bi’r-i mâyı ve zât-ı eşcâr hadîkayı ve muhavvata-i hâriciyesi bir bâb tahtânî odayı ve ahûru ve kenîfi müştemil olan menzilin zikr olunan cemî‘ muhavvata-i dâhiliyesini kâffe-i hukūk-ı müştemilât ve hukūk ve merâfıkı ile ba‘de’t-tahliyeti’ş-şer‘iyye ve’l-ifrâz mezbûr Mehmed Efendi’ye hibe-i sahîha-i muhavveze-i şer‘iyye ile hibe ve temlîk ve teslîm eyledi. Ol dahi meclis-i hibede ittihâb ve temellük ve tesellüm eyledikden sonra yine müvekkile-i merkūme İsmihân Hâtun’dan ve taht-ı tasarrufunda muntazam mülk ve hakkı olup esmâları mastûr olan bir cild mushaf-ı şerîf ve bir cild Dürr-i Azer? ve iki cild Kudûrî ve bir cild Vikāye ve bir cild-i muntazam <> Kudûrî ve bir cild Âdâd-ı Kādî ve bir cild Edeb-i Kādî ve bir cild Lisânü’l-hukkâm ve bir cild Hâfız ve bir cild Kurretü’l-Ayn ve iki cild Mecmû‘a-i Rûmât ve bir cild Ravzatü’l-Ahbâr ve bir cild Muhammediyye ve bir cild Ahterî ve bir cild Merdûdnâme? ve bir cild Nasîhatü’l-Mülûk ve bir cild Evveliyât ve bir cild Seyyid b. Ali-zâde ve bir cild Nâfi‘u’ş-Şerâyi‘ ve bir cild Mecmu‘a-i Tıp ve bir cild Çağmanî Şerhi Kadızâde ve bir cild Mülahhas Şerh-i Çağminî ve bir cild Nevâzil ve bir cild Mecmu‘a-i diğer ve bir cild-i râbi‘ Kādî Beyzâvî ve bir cild Kenzü’d-dakāyık, ve bir cild Eşbâh-ı Nazâir ve bir cild Kitâbü’s-salât ve dört cild Mecmu‘a-i Fevâyid ve bir cild Müntehâb ve bir cild Manzûme-i Kâfiye ve bir cild Kitâbü’l-Ahkâm ve bir cild Fezâil-i Mescid-i Aksâ ve bir cild Avâmil ve Muğrıbî ve bir cild Bâdü’l-Cinnân? ve iki cild Siyer-i Nebî ve bir cild Münâcât-ı Musa aleyhi’s-selâm ve bir cild Şer‘-i Akâ’idi Ani’l-Fevâ’id ve bir cild Ferâ’iz-i Secâvendî ve bir cild Kitâb-ı Tayyib ve yine bir cild Mecmu‘a-i …? ve bir cild Hadîs …? ve …? ve bir cild …? ve bir cild Fârisî Mecmu‘a ve bir cild Dîvân-ı Sultan Süleyman ve bir cild Mecmu‘a-i Nahiv ve bir cild Mecmu‘a-i Lugat ve iki cild Meşâhidî ve iki cild Kasîde-i Bürde ve bir cild Mecmu‘a-i Cemelnâme ma‘a ed‘iye ve bir cild Hâşiye-i Hayâlî ve bir cild Ferişte Oğlu ma‘a Mecmu‘atü’l-Bahreyn ve bir cild Risâle-i Tercîh-i Taklîl ve bir cild Kutbeddin ve bir cild Rebî‘u’l-Kulûb ve bir cild Türkî Ta‘bîr ve bir cild Mecmu‘a-i Nefîs-i Tefsîr-i Şerîf ve bir cild Menâkıb-ı Evliyâ ve bir cild Fusûsu’l-Arîz ve bir cild Tasvîr-i Beyt-i Şerîf ve bir cild Minhâc-ı Lâ Yünhâc ve iki cild En‘âm-ı Şerîf ve bir cild Zübdetü’l-Meclis ve iki cild Fârisî Lugat ve bir Envâr u lâmi‘u’s-Subh? ve bir cild Hibbet-i Müte‘allik Risâle ve bir cild Pendnâme-i Attâr ve bir cild Menâkıb-ı Ashâb-ı Güzîn ve bir cild Kitâbü’l-Halîl li’l-Hass ve bir cild Menâr kitâbı cem‘an yetmiş dokuz cild kitâblarını dahi zevci mezkûr Mehmed Efendi’ye hibe-i sahîha-i muhavveze-i şer‘iyye ile hibe ve temlîk ve teslîm eyledi. Ol dahi meclis-i hibede ittihâb ve temellük ve tesellüm eyledikden sonra yine müvekkile-i mezbûre İsmihân Hâtun nikâh-ı ma‘kūd olup zevci mezbûr Mehmed Efendi Bey’in zimmetinde olan otuz bin fıddî râyic fi’l-vakt cedîd akçe mehr-i müeccel hakkından yirmi beş bin akçesini dahi zevc-i mezbûr Mehmed Efendi’ye hibe-i sahîha ile hibe eyledi. Ol dahi kabûl eyleyip min ba‘d zikr olunan menzilin muhavvata-i dâhiliyesi kâffe-i hukūkuyla zikr olunan yetmiş dokuz aded kitâblar dahi mezkûr Mehmed Efendi’nin mülk-i mevhûbu ve hakk-ı sırfıdır ve zikr olunan otuz bin akçe mehr-i müeccelin yirmi beş bin akçesinden zimmetini ibrâ ve iskāt ile berî oldu dedikde vekîl-i mezbûr el-Hâc Abbas Bey’in ikrâr-ı meşrûhunda el-mukarru lehü’l-mezkûr Mehmed Efendi vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis aşer min şehri Rebî‘ulâhir li sene [tis‘a] ve hamsîn ve elf. Şuhûdü’l-hâl: Fahrü’l-eimme Süleyman Efendi b. Hamza, Hasan Çelebi b. Abdurrahman el-Hammâmî, Mehmed Çelebi b. el-Hâc Abbas, Hasan Bey b. Abdullah, Hüseyin Beşe b. ( ), Kâtibü’l-hurûf Mustafa Çelebi, Süleyman Çelebi b. Yusuf el-müderris, İbrahim b. Himmet, Yahya b. Zekeriya.