Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 195 Hüküm no: 204 Orijinal metin no: [48a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aydın sancağı mutasarrıfı İshak Paşa’nın, Tire mütesellimi Mustafa Çelebi ve Güzelhisar mütesellimi İsmail Çelebi’ye olan borçlarına kefalet Hâlâ ber vech-i arpalık Aydın sancağına mutasarrıf olan İshak Paşa’nın Tire mütesellimi olan Mehmed Ağa b. Şaban ve Güzelhisar mütesellimi olup Çavuşzâde demekle şehîr Mehmed Ağa b. Mehmed meclis-i şer‘-i hatîr-i lâzımü’t-tevkīrde işbu râfi‘ü’l-vesîka el-Hâc Mustafa Çelebi b. Abdullah ve İsmail Çelebi b. el-Hâc Hasan mahzarlarında her biri tav‘an ikrâr ve i‘tirâf edip mezbûr el-Hâc Mustafa Çelebi’nin paşa-yı müşârun-ileyhin zimmetinde on bin kıt‘a riyâlî kuruşu mezbûr İsmail Çelebi’nin dahi on bin kıt‘a riyâlî kuruş, cem‘an yirmi bin kıt‘a riyâlî kuruş hakları olup meblağ-ı mezbûrun beş bin kıt‘a riyâlî kuruşuna mezbûr Çavuşzâde Mehmed Ağa ve on beş bin kıt‘a riyâlî kuruşuna dahi mezkûr olan Mehmed Ağa tarafeynden emir ve kabûlü hâviye kefâlet-i sahîh-i şer‘iyye ile kefîl oldular dediklerinde gıbbe’t-tasdîki’l-vicâhi’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min Cemâziyelâhir li sene tis‘a ve hamsîn ve elf. Şuhûdü’l-hâl: Cafer Çavuş b. Sefer, İskender Bey b. Şaban, Mustafa Çelebi b. Mehmed.