Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 196 Hüküm no: 205 Orijinal metin no: [48b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb Beşe b. Sefer’in eşi Ceyhun bt. Abdullah’ta alacağı kalmadığı Mahmiye-i İstanbul’da Mimar Sinan Mahallesinde sâkin Receb Beşe b. Sefer nâm kimesne meclis-i şer‘-i şerîfde zevcesi işbu bâ‘isetü’l-kitâb Ceyhun Hâtun bt. Abdullah mahzarında tav‘an ikrâr ve i‘tirâf edip zevcesi mezkûre Ceyhun Hâtun bundan akdem mahmiye-i mezbûrede Uzun Şucâ‘ mahallesinde vâki‘ menzilin ebniyesine harc ve sarf için kendi malından ikrâz zamla benden on iki bin fıddî cedîd râyic fi’l-vakt akçe iktirâz ve kabz eylemişdi. Hâlâ meblağ-ı mezbûr on iki bin cedîd akçe hakkımı zevcem mezkûre Ceyhun Hâtun’un yedinden tamâmen alıp kabz eyledim. min ba‘d zimmetinde bir akçe ve bir habbe hakkım kalmamışdır dedikde mezbûr Ceyhun Hâtun mukırr-ı mezbûr cârî ve sâdır olan ikrâr-ı meşrûhunda vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min şehri Rebî‘ilevvel sene tis‘a ve hamsîn ve elf. Şuhûdü’l-hâl: Abdüllatif Efendi b. Mehmed el-imâm, el-Hâc Osman b. Musa el-müezzin, Mustafa b. el-müezzin, Osman Bey b. Şaban, Yusuf Bey b. Abdullah, Mustafa Bey et-Tanbûrî, Tahsin b. Mehmed.