Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 196 Hüküm no: 206 Orijinal metin no: [48b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdolu Osman b. Himmet’in Mustafa Paşa aleyhindeki alacak davasında sulh olması Vilâyet-i Anadolu’da Karahisâr-ı Şarkî sancağında Sisorta kazâsına tâbi‘ Elma nâm karyeden Abdolu Osman b. Himmet meclis-i şer‘-i hatîrde sâbıkā ber vech-i arpalık Karahisâr-ı Şarkî sancağına mutasarrıf olan emîrü’l-ümerâ’i’l-kirâm kebîrü’l-küberâi’l-fihâm zü’l-kadr-i ve’l-ihtirâm sâhibü’l-izz ve’l-ihtişâm Ketgaç? Mustafa Paşa -yesserallâhu mâ yürîd ve mâ yeşâ hazretleri tarafından ikrâr-ı âti’l-beyânı tasdîka vekîl olup bimâ-hüve nehcü’s-sübût şer‘an vekâleti sâbite olan fahrü’l-a‘yân Tokâdî Mustafa Ağa b. el-Hâc Murad Çavuş mahzarında bi’t-tav‘i’s-sâf ikrâr ve i‘tirâf edip müvekkil-i mûmâ-ileyh bundan akdem mârrü’z-zikr sancağa ber vech-i arpalık mutasarrıf olduğu hâlde benim için kız bozdun deyû beni ahz ve habs nâ-hak yedimden yüz elli riyâlî kuruşumu ve bir donluk kırmızı acem kadifemi ve yirmi riyâlî kuruş kıymetli bir acem kılıcımı ahz u kabz eylemişdir. Hâlâ müvekkil-i müşârun-ileyh zafer bulmakla meblağ-ı mezbûr yüz elli riyâlî kuruş ve zikr olunan kadife ve kılıcı taleb ve da‘vâ eylediğimde ol dahi bi’l-külliye inkâr edip benim dahi beyyinem olmamağla beynimizde münâza‘ât-ı kesîre vâkı‘a olmuşdu. El-hâletü hâzihî beynimize muslihûn tavassut edip da‘vâ-yı mezbûremden beni müvekkil-i mûmâ-ileyh Ketgaç? Paşa ile an inkâr altmış kıt‘a riyâlî kuruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr altmış kıt‘a riyâlî kuruşa meclis-i sulhda müvekkil-i müşârun-ileyh yedinden tamâmen ahz u kabz edip da‘vâ-yı mezbûremden berî olup husûs-ı mezkûra müte‘allika âmme-i da‘vâdan müvekkil-i mûmâ-ileyh Ketgaç? Mustafa Paşa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim. Min ba‘d husûs-ı mezkûra müte‘allika ve sâyir hukūk-ı ma‘lûme ve hukūk-ı mechûleye müte‘allika bi vechin mine’l-vücûh ve sebeben mine’l-esbâb müvekkil-i müşârun-ileyh Ketgaç? Mustafa Paşa üzerine da‘vâ ve hakkım kalmadı dedikde, mukırr-ı mezbûru ikrâr-ı meşrûhunda vekîl-i mezbûr vicâhen tasdîk ve şifâhen tahkīk edicek, mâ vaka‘a bi’t-taleb ketb olundu. Hurrire fi’l-yevmi’l-hâdî ve’l-ışrîn min şehri Rebî‘ulâhir sene 1059 Şuhûdü’l-hâl: Osman Çavuş b. Hızır Çavuş, Mehmed Çavuş b. Resûl, Haydarzâde Ali Bey Karahisâr-ı Şarkî.