Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 197 Hüküm no: 207 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot v. Dimitri’nin lahana bahçesini Komino v. Rizo’ya sattığı Vilâyet-i Rumeli’nde İnebahtı sancağında vâki‘ Kerpiniş kazâsına tâbi‘ Pavlopolo nâm karyeden Panayot v. Dimitri nâm zimmî meclis-i şer‘-i hatîr-i lâzımü’t-tevkīrde yine karye-i mezbûre sükkânından işbu sâhibü’l-vesîka Komino v. Rizo nâm zimmî mahzarında tav‘an ikrâr ve i‘tirâf edip işbu akdin sudûruna değin yedimde ve taht-ı tasarrufumda mülk ve hakkım olup karye-i mezbûrede vâki‘ bir tarafı Tarandafilo v. Yorgi tarlasına ve bir tarafı Yani v. Sebo? tarlasına ve iki tarafı müşteri-yi mezbûr Komino bostanına müntehî tahmînen bir dönüm lahana bostanımı cemî‘ içinde olan eşcârıyla ve kâffe-i hukūk ve merâfıkı ile mezbûr Komino’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile iki bin fıddî râyic fi’l-vakt cedîd akçeye bey‘ edip ol dahi nefsiyçün iştirâ eylediğinden sonra semeni olan meblağ-ı mezbûr iki bin akçeyi mezbûr Komino yedinden tamâmen ahz u kabz eyleyip zikr olunan bostanı mahallinde kabz ve tasarrufa mezbûr Komino’yu tarafımdan taslît eyledim dedikde, mukırr-ı mezbûru ikrâr-ı meşrûhunda el-mukarru lehü’l-merkūm Komino vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’l-âşer min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Yahya Bey b. Zekeriya, İsa Bey b. Ahmed, Ahmed Çelebi b. Abdurrahman, Yorgi v. Danyal, Dido v. Aleksi ve gayruhüm.