Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 198 Hüküm no: 208 Orijinal metin no: [49a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. merhûm Mühürdâr Mehmed Ağa ve kardeşi İsmihân’ın, babalarından intikal eden Eflâk asıllı câriyelerini âzat ettikleri Mahmiye-i Kostantıniyye mahallâtından Keçe Hanı mahallesinde sâkin olan Ahmed Ağa b. merhûm Mühürdâr Mehmed Ağa kıbelinden âtiyyü’z-zikr âzat ve tahrîr ikrârına vekâleti yine mahalle-i mezbûre sükkânından Mustafa b. Piyâle ve Hasan b. Hüseyin nâm kimesnelerin şehâdetleri ile sâbit olan Yunus Beşe b. Abdullah nâm kimesne ve İsmihân bt. merhûm-ı mezbûr Mühürdâr Mehmed Ağa nâm hâtun kıbelinden yine âtiyyü’z-zikr âzat ve tahrîr ikrârına vekâleti kendisini ma‘rifet-i şer‘iyye ile tanıyan şâhideyn-i mezkûreynin şehâdetleri ile sâbit olan Fâtıma Hâtun bt. Mehmed nâm hâtun meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf- hâzırân olup müvekkileyn-i mezbûreynlerinin merhûm-ı mezbûr Mühürdâr Mehmed Ağa’dan kendilerine irs-i şer‘î ile intikāl eden, rıkkını mu‘terife, açık kaşlı, elâ gözlü, orta boylu, Eflakiyyetü’l-asl, müslimetü’l-millet hâmile-i hâze’l-kitâb Vildan bt. Abdullah nâm câriye-i memlûkelerini hasbeten lillâhi’l-aliyyi’l-azîm ve taleben li merdâti’r-rabbi’r-rahîm ve Nebiyy-i muhtârın “Kim bir müslümanı âzat ederse Allah onun bütün uzuvlarını cehennem ateşinden âzat eder.” kavline uyarak âzat ve tahrîr ettiğini bi’l-vekâle ikrâr ve i‘tirâf ettiler. Câriye-i mezbûre bu sûretle harâir-i asliyyât-ı mükellefâttan hürre bir kimesne oldu. Efendilerin âzatlı köleler üzerinde sâhib oldukları velâ hakkından gayrı, üzerinde kimesnenin bir hakkı kalmadı. Cerâ zâlike ve hurrire fi’l-yevmi’s-sânî ve’l-ışrîn min şehri Rebî‘ilâhir sene tis‘a ve hamsîn ve elf. Şuhûdü’l-hâl: Fereş? Halîfe b. Ahmed el-müezzin, Mehmed b. Receb, Abdullah b. Yusuf, Yahya b. Zekeriya, el-Hâc Hüseyin b. Mehmed, Ahmed b. Abdülkerim, İsa Bey b. Ahmed, Ahmed b. muhzır Mehmed