Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 199 Hüküm no: 210 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Hüseyin’in yaralayan İbrahim b. Durak’ın cezalandırılması Vilâyet-i Rumeli’nde vâki‘ Bihlişte kazâsına tâbi‘ Dilaverde nâm karyeden işbu sâhibü’l-kitâb Ali b. Hüseyin nâm kimesne meclis-i şer‘-i hatîr-i lâzımü’t-tevkīrde Dârü’l-hilâfeti’l-aliyye mahmiye-i Kostantıniyye’de Küçük Karaman nâm mevzi‘de sâkin İbrahim b. Durak nâm hayyât muvâcehesinde üzerine takrîr-i da‘vâ edip işbu İbrahim târih-i kitâbdan bir gün mukaddem bir vakıf arsada mevzi‘-i mezbûrda Aydın Çavuş Bozahânesi’nin ocağı kurbunda sol sağranımdan? amden bıçak ile vurup beni mecrûh eyledi. Suâl olunup mûceb-i şer‘-i şerîf olunması matlûbumdur dedikde, gıbbe’s-suâl mezbûr İbrahim cevâbında fi’l-hakīka müdde‘î-i mezbûr Ali beni ta‘cîz etmekle ben dahi vech-i muharrer üzre bıçak ile amden vurdum deyû tav‘an ikrâr ve i‘tirâf etmeğin mezbûr İbrahim üzerine ta‘zîr ve ile’l-ber’ mecrûh-ı mezkûrun ücret-i cerrâh ve kıymet-i edviyesiyle ilzâm olunup, mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâdî ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Mehmed b. Osman el-mübâşir, Murad Beşe b. Ahmed, Mehmed b. Davud, Aydın b. Sinan.