Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 200 Hüküm no: 212 Orijinal metin no: [49b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marko v. Beço’nun Derviş b. Pervane’de olan alacağını sulhen tahsil ettiği <> Bozacı tâifesinden Marko v. Beço nâm zimmî meclis-i şer‘-i hatîr[de] tâife-i mezbûreden işbu râfi‘ü’l-vesîka Derviş b. Pervâne nâm müslim mahzarında tav‘an ikrâr edip cihet-i deyn-i şer‘îden mezbûr Derviş zimmetinde üç bin fıddî cedîd râyic fi’l-vakt akçe hakkım olup meblağ-ı mezkûra merkūm Derviş’ten taleb eyledikde beynimizde muslihûn tavassut edip meblağ-ı mezkûr üç bin akçe da‘vâsından beni mezkûr Derviş ile iki bin iki yüz râyic fi’l-vakt akçe üzerine akd-i sulh inşâ eylediklerinde ben dahi sulh-ı mezkûru kabûl ve bedel-i sulh olan meblağ-ı mezkûr iki bin iki yüz akçe mezkûr Derviş yedinden ahz u kabz edip husûs-ı mezkûr da‘vâsından mezkûr Derviş’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim. Husûs-ı mezkûra müte‘allik mezbûr Derviş üzerine bir vechile da‘vâ ve hakkım kalmadı dedikde, mukırr-ı mezbûr Marko’yu ikrâr-ı meşrûhunda el-mukarru lehü’l-merkūm vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Kigo v. Ostoya, Koki v. ( ), Molo ve. Mitro, Dimitro v. Sahak.