Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 200 Hüküm no: 213 Orijinal metin no: [50a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasef v. Kirkor’un, alacağına kefil olan Kirkor v. Ağcan’ın terekesinden borcun ödenmesi için dul eşi Şehzik bt. Aslan’a tenbihte bulunulduğu Mahmiye-i İstanbul’da Sulumanastır kurbunda Hâcce Hâtun mahallesinde sâkin Yasef v. Kirkor nâm Ermeni zimmî meclis-i şer‘-i şerîf-i lâzımü’t-teşrîfde Sulumanastır mahallesinde sâkin iken hâlik olan Kirkor v. Ağcan nâm Ermeni zimmînin zevcesi ve verâsesi olup terekesine vâzı‘atü’l-yed olan Şehzik? bt. Aslan nâm Ermeniye mahzarında üzerine takrîr-i da‘vâ edip mahmiye-i mezbûrede Ermeni keferesinin patriki olan Kiragos v. Avanos nâm râhib zimmetinde dergâh-ı âlî yeniçerileri çavuşlarından işbu hâzır bi’l-meclis Receb Çavuş b. Mustafa karz-ı şer‘îden beş bin riyâlî kuruş ve yedinden müşterâ ve makbûz ma‘lûmü’l-levn ve’l-envâ‘ çuka bahâsından iki yüz riyâlî kuruş cem‘an beş bin iki yüz riyâlî kuruş hakkı olup bundan akdem hâlik olan merkūm Kirkor ile Davudpaşa kurbunda Yeni Mahalle’de Taşçı Sakar v. Toryo ve Hacı Sinan nâm Ermenilerden her biri hâl-i hayâtında ve zamân-ı nefâz-ı tasarrufâtında bin elli bir senesi Recebinin dokuzuncu günü meblağ-ı mezbûrun cümlesine tarafeynden emir ve kabûlü hâviye kefâletiyle kefîl olup ba‘dehû ben dahi küfelâ-yı mezbûrdan Kirkor ve Taşçı Sakar ve Hacı Sinan her birinin bi hükmi’l-kefâle zimmetlerinde olan meblağ-ı mezbûr beş bin iki yüz riyâlî kuruş tarafeynden emir ve kabûlü hâviye kefâletle kefîl olup ba‘de zamânin meblağ-ı mezbûru kable’l-îfâ asîl-i mezbûr Kiragos ve küfelâ-yı merkūmdan Kirkor [ve] Taşçı Seber ve Hacı Sinan bir biri ardınca hâlik oldukdan sonra mezbûr Receb Çavuş sene seb‘a ve hamsîn ve elf Saferü’l-hayrının sekizinci günü meblağ-ı mezbûru bi hükmi’l-kefâle beyyine-i âdile ile huzûr-ı hâkimde şer‘an muvâcehemde isbât edip mezbûr Receb Çavuş meblağ-ı mezbûru asîl-i merkūm ve küfelâ-yı mezbûrûndan hâl-i sıhhatlerinde küllen veya ba‘zan asâleten veya vekâleten ahz ve istîfâ eylemediğine veya turuk-ı şer‘iyyeden bir tarîk ile zimmetlerini ibrâ eylemediğine gıbbe’l-istihlâf yemîn billâhi’l-aliyyi’l-azîm etmeğin edâsına ba‘de’l-hükm meblağ-ı mezbûr beş bin iki yüz riyâlî kuruşu mezbûr Receb Çavuş’a tamâmen îfâ ve teslîm eyledim, ol dahi istîfâ ve kabz eylemişdir. Hâlâ mürâca‘at edip meblağ-ı mezbûru hâlik-i merkūm Kirkor’un muhallefâtından taleb eder, suâl olunsun dedikde gıbbe’s-suâl ve akībe’l-inkâr müdde‘î-i mezbûrun müdde‘âsını mübeyyin beyyine taleb olundukda udûl-i ahrâr-ı ricâl-i müslimînden Mustafa Efendi b. ( ) el-mu‘allim ve Mehmed b. Osman nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd her biri şehâdet edip fi’l-hakīka işbu hâzır bi’l-meclis Receb Çavuş b. Mustafa’nın mahmiye-i İstanbul’da Ermeni keferesinin patriki olan Kiragos v. Avanos nâm râhib zimmetinde karz-ı şer‘îden beş bin riyâlî kuruş ve ma‘lûmü’l-levn ve’z-zirâ‘ çuka bahâsından iki yüz riyâlî kuruş cem‘an beş bin iki yüz riyâlî kuruş hakkı olup bundan akdem hâlik olan Kirkor v. Ağcan ve Taşçı Sakar v. Turan ve Hacı Sinan nâm her biri hâl-i hayâtlarında ve zamân ve nefâz-ı tasarrufâtlarında bin elli bir senesi Recebinin dokuzuncu günü meblağ-ı mezbûr beş bin iki yüz riyâlî kuruşun cümlesine tarafeynden emir ve kabûlü hâviye kefâletle kefîl oldukdan sonra işbu Yasef dahi küfelâ-yı mezbûra Kirkor ve Taşçı Sakar ve Hacı Sinan’dan her birinin bi hükmi’l-kefâle zimmetleri olan meblağ-ı mezbûr Beş bin iki yüz riyâlî kuruşa tarafeynden emir ve kabûlü hâviye kefâletle kefîl olup ba‘de zamânin meblağ-ı mezbûru kable’l-îfâ asîl-i mezbûr ve küfelâ-yı mezbûrûn birbiri ardınca hâlike oldukdan sonra bi hükmi’l-kefâle mezbûr Receb Çavuş meblağ-ı mezbûru beyyine-i âdile ile merkūm Yasef’in muvâcehesinde isbât edip meblağ-ı mezbûru asîl-i merkūme Kiragos ve küfelâ-yı merkūmûn Kirkor ve Taşçı Sakar ve Hacı Sinan’dan hâl-i sıhhatlerinde küllen veya ba‘zan asâleten veya vekâleten ahz ve istîfâ etmeyip ve turuk-ı şer‘îden bir tarîk ile zimmetlerini ibrâ eyle[me]diğine gıbbe’l-istihlâf yemîn billâhi’l-aliyyi’l-azîm etmeğin meblağ-ı mezbûr beş bin iki yüz riyâlî kuruşun merkūme Yasef’in yedinden bizim huzûrumuzda bi’t-tamâm alıp kabz eyledi. Hâlâ işbu müdde‘î Yasef’e meblağ-ı mezbûr beş bin iki yüz riyâlî kuruşun hâlik-i merkūm Kirkor terekesinden edâsı vâcibdir. Biz bu husûsa bu vechle şâhidleriz şehâdet dahi ederiz deyû her biri münkire-i mezbûre Şehzik? muvâcehesinde edâ-yı şehâdet-i şer‘iyye eylediklerinde [50b] gıbbe ri‘âyeti şerâyiti’l-kabûl şehâdetleri makbûle olmağın şehâdet-i mezbûre mûcebince müdde‘î-i mezbûra meblağ-ı müdde‘ânın tereke-i hâlik-i merkūm Kirkor’dan edâsına merkūm Şehzik mahzarında hâlik-i mezbûr üzerine hükm olunup mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Ahmed Çavuş b. İvaz, Süleyman Ağa b. Pîrî, Mahmud Ağa b. Şahab, İbrahim Bey b. Hasan, İbrahim Efendi b. Şaban.