Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 202 Hüküm no: 214 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meknun bt. Abdullah’ın eşi Mehmed Ağa b. Abdullah’tan boşandığı Mahmiye-i İstanbul’da Sofular mahallesinde sâkine Meknun bt. Abdullah meclis-i şer‘-i hatîr-i lâzımü’t-tevkīrde mu‘takı ve zevci Mehmed Ağa b. Abdullah tarafından husûs-ı âti’l-beyâna vekîl olup vekâleti Mehmed Çelebi b. Nurullah ve Şaban Beşe b. Ali şehâdetleri ile şer‘an sâbite olan el-Hâc Süleyman b. Zeynelabidin mahzarında tav‘an ikrâr ve i‘tirâf edip müvekkil-i merkūm Mehmed Ağa benim zevc-i dâhil-i bihâm hâlâ beni talâk-ı bâyin ile tatlîk eyledikde zimmetinde mütekarrir olan nikâhım ma‘kūd elli bin fıddî râyic fi’l-vakt akçeyi ve nafaka-i iddet-i mu‘ayyene-i ma‘lûmem ve me’ûnet-i süknâm mukābelesinde dahi ber vech-i peşîn dokuz yüz mezbûru’n-nakit akçeyi vekîl-i mezbûr el-Hâc Süleyman yedinden tamâmen ahz u kabz edip zevciyyete müte‘allika âmme-i da‘vâdan müvekkile-i merkūm Mehmed Ağa’nın zimmetini ibrâ-i âmm-ı kātı‘ü’n-nizâ‘la ibâr ve iskāt eyledim dedikde, mukırra-i mezbûre ikrâr-ı meşrûhunda vekîl-i mezbûr vicâhen tasdîk ve şifâhen tahkīk edicek, bimâ hüve’l-vâki‘ bi’t-taleb ketb olundu. Hurrire fi’l-yevmi’s-sânî ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Sunullah Efendi b. Bekir, Süleyman Bey b. Abdullah, Osman Çelebi b. Mehmed, Mustafa Çelebi b. Hacı Mehmed, Ahmed Beşe b. Mehmed, Yusuf Çelebi [b.] Canbaz.