Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 207 Hüküm no: 222 Orijinal metin no: [51b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Beşe b. Mehmed ve Vahid Çavuş b. Abdullah’ın, Mustafa Çavuş’un kefillerinden alacaklarını tahsil ettikleri Mahrûse-i Galata kazâsına tâbi‘ kasaba-i Tophâne’de Defterdâr mahallesinde sâkin Osman Beşe b. Mehmed meclis-i şer‘-i hatîr-i lâzımü’t-tevkīrde kendi tarafından asîl ve Vahid Çavuş b. Abdullah ( ) b. ( ) taraflarından ikrâr-ı âti’l-beyânı tasdîka vekîl olup vekâletleri bimâ-hüve nehcü’s-sübût şer‘an sâ[bite] olan işbu râfi‘ül-kitâb Hüseyin Bey b. Mahmud ve Mehmed Çelebi b. Ali mahzarında bi’t-tav‘i’s-sâf ikrâr ve i‘tirâf edip sâbıkā Bursa emîni olan Mustafa Çavuş b. Abdullah zimmetinde cihet-i deyn-i şer‘îden on altı bin fıddî râyic fi’l-vakt akçe <> ve cihet-i karz-ı şer‘îden dahi yirmi iki bin mezbûreynin mezbûru’n-na‘t akçe cem‘an kırk sekiz bin akçe hakkım olup meblağ-ı mezbûra merkūmûn Ahmed Çavuş ve Abdullah ve Hüseyin Bey ve Mehmed Çelebi tarafından emir ve kabûlü hâviye kefâlet-i sahîha-i şer‘iyye ile kefîl olmuşlar idi. El-hâletü hâzihî meblağ-ı mezbûr kırk sekiz bin akçeyi merkūmûn Ahmed Çavuş ve Abdullah ve Hüseyin Bey ve Mehmed Çelebi yedlerinden tamâmen ahz u kabz edip meblağ-ı mezbûrûndan merkūmûnun ve aslın zimmetleri berî olmuşdur dedikde, mukırr-ı mezbûru ikrâr-ı meşrûhunda el-mukarru lehü’l-merkūmân asâleten ve vekâleten ve vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Mustafa b. Siyami, İsa Bey b. Ahmed, Bayram Çavuş b. Mustafa, Mehmed b. Mustafa, Osman Efendi el-kâtib, Hüseyin Efendi el-kâtib, Şaban Efendi el-kâtib, Receb Efendi el-kâtib, Mehmed Sipâhi b. Davud?, Hacılızâde Ahmed Çavuş.