Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 209 Hüküm no: 224 Orijinal metin no: [52b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hancure? Hâtun bt. Abdullah’ın, malının üçte birine eşi Receb Beşe b. Sefer’i vasî tayin ettiği Mahmiye-i İstanbul’da Mimar Ayas mahallesinde sâkine Hancure? Hâtun bt. Abdullah meclis-i şer‘-i hatîr-i lâzımü’t-tevkīrde vesâyâ-yı âtiyetü’l-beyânı tenfîz için vasiyy-i muhtâr nasb eylediği zevci işbu râfi‘atü’l-kitâb Receb Beşe b. Sefer nâm kimesne mahzarında da‘vâ ve ikrâr ve takrîr-i kelâm edip billâhi te‘âlâ dâr-ı dünyâdan saray-ı ukbâya intikāl ve irtihâl eylediğimde sülüs malımdan altı bin cedîd râyic fi’l-vakt akçem ve yedimde hakkım olan bir tek altın ândişe? bileziğim ifrâz olundukdan sonra zikr olunan bileziği sûk-ı sultânîde ba‘de’l-müzâyede semen-i misli ile bey‘ olunup semen-i hâsılası meblağ-ı müfrez-i mezbûre altı bin cedîd râyic akçeye halt olundukda mecmû‘ meblağından iki akçe ıskāt-ı salâtıma ve iki bin akçe techîz ve tekfîne ve sâyir levâzım-ı defne harc ve sarf oluna ve bâkī kalan meblağ ile yevm-i mevtimin ve yedimde ve kırkımda ve altı ayda ve senemde ta‘âm iştirâ ve tabh olunup fukarâ-i müslimîne it‘âm oluna deyû vasiyet edip vesâyâsını tenfîze zevci mezbûr Receb Beşe’yi vasiyy-i muhtâr nasb ve ta‘yîn eyledikde mezbûr Receb Beşe dahi vesâyet-i merkūmeyi kabûl ve hizmet-i lâzımesini edâya müte‘ahhid olmağın mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Abdüllatif Efendi b. Mehmed, el-Hâc Osman b. Ahmed el-müezzin, Mustafa b. Ahmed el-müezzin, Osman Beşe b. Şaban, Hüseyin b. Nasuh el-Kiyâni, Zerkûb b. Musa Beşe. Mustafa Bey es-Sanûverî?