Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 210 Hüküm no: 225 Orijinal metin no: [52b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rüşd ve büluğa eren Fâtıma bt. Rıdvan’ın, vasîsi Hasan Bey b. Ferhad’da olan parasını teslim aldığı Havâss-ı Kostantıniyye kazâsına tâbi‘ Çekmece nâm kasaba ahâlîsinden iken tarîk-i hakk-ı şerîfde Mısır’da vefât eden Mehmed b. Rıdvan’ın sulbiye kebîre kızı olup mahmiye-i İstanbul’da Laleli Çeşme’de Kuyumcu Bahşâyiş mahallesinde sâkine Fâtıma Hâtun tarafından ikrâr-ı âti’l-beyâna vekîl olup vekâleti bimâ-hüve nehcü’[s-sübût] mezbûreyi ma‘rifet-i şer‘iyye ile ârifeyn olan Mustafa Çelebi b. Süleyman ve Hacı Ali Bey b. Abdullah el-bevvâbü’s-sultânî şehâdetleri ile şer‘an sâbite olan Ahmed Bey b. Abdi meclis-i şer‘-i hatîrde müvekkile-i mezbûrenin hâl-i sıgarında tesviye-i umûruna kıbel-i şer‘-i enverden mansûb vasîsi olan işbu râfi‘ü’l-vesîka Hasan Bey b. Ferhad mahzarında bi’l-vekâle tav‘an ikrâr ve i‘tirâf edip müvekkile-i mezbûre Fâtıma Hâtun sagīre olduğu ve hâlde babası ve mûrisi olan müteveffâ-yı mezbûr Mehmed vefât eyledikde terekesi ber-mûceb-i kassâm-ı defter ve gayr-i zimmet ba‘de’t-taksîm beyne’l-verese müvekkilem mezbûreye isâbet eden doksan iki bin altı yüz yedi râyic fi’l-vakt akçeyi mezbûr Hasan Bey bi’l-vesâye ahz u kabz edip ile’l-bülûğ zabt eylemişdi. El-hâletü hâzihî müvekkilem mezbûre bâliğa olup kendiye rüşd istînâs eylemekle âhara nefsini tezvîc lâzım gelip cihâzı için meblağ-ı mezkûr doksan iki bin altı yüz yedi akçeyi vasîsi mezkûr Hasan Bey yedinden ahz u kabz edip meblağ-ı mezkûra müte‘allika müvekkilem mezkûre Fâtıma Hâtun’un mezbûr Hasan Bey üzerinde da‘vâ ve hakkı kalmadı dedikde, mukırr-ı mezbûr Ahmed Bey’in bi’l-vekâle hâvî olan ikrâr-ı meşrûhunu el-mukarru lehü’l-mezbûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Mustafa Ağa b. Hüseyin, Feridun Ağa b. Abdullah, İbrahim Çelebi b. Mustafa Ağa, Hüseyin? Ağa b. ( ), Mirahor Hüseyin Ağa, Kâtib Mehmed Çelebi b. ( ), Ali Çelebi b. Bekir, Hakkı Çelebi b. el-bâbü’s-sultânî, es-Seyyid Yakub Efendi.