Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 211 Hüküm no: 227 Orijinal metin no: [53a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cizyedâr Mehmed Beyzâde Ali Çelebi’nin topladığı cizye parasını ve babasının borcunu, Yusuf Bey b. Hamza’ya teslim ettiği Vilâyet-i Rumeli’nde kasaba-i Dubnice’de Alişan mahallesinde sâkin Şa‘îr Dâmâdı demekle ma‘rûf Mehmed Beyzâde Ali Çelebi meclis-i şer‘-i hatîrde işbu bâ‘isü’l-kitâb Yusuf Bey b. Hamza mahzarında bi’t-tav‘i’s-sâf ikrâr ve i‘tirâf edip bundan akdem Vezîr-i a‘zam Salih Paşa telhîscisi olup mahmiye-i İstanbul’da Vefa kurbunda Dârü’l-hadîs mahallesinde sâkin iken vefât eden Siyavuş Ağa’nın bundan akdem Köstendil cezîresinde sebeb-i tahrîr emriyle otuz bin fıddî râyic fi’l-vakt akçesi olup ben cizyedâr olmağla mezbûr Yusuf Bey’in meblağ-ı mezkûru merkūm Siyavuş Ağa tarafından ben dahi ahz u kabz [edip] gelip meblağ-ı mezkûru yedimden tamâmen ahz eylediğinden gayrı mezbûr Siyavuş Ağa’nın hazînedârı olan Musa Çelebi b. Mehmed’in dahi müteveffâ babam mezbûr Mehmed Bey zimmetinde cihet-i karzdan otuz altı bin fıddî râyic fi’l-vakt akçe hakkı olmağla meblağ-ı mütekarrız-ı mezkûr otuz altı bin akçeyi babam mezbûr terekesinden mezbûr Musa Çelebi’ye îsâl için mezbûr Yusuf Bey’e teslîm edip ol dahi sebeb-i tahrîr akçesi olan otuz bin akçeyi mezkûr Siyavuş Ağa’ya ve karz olan otuz bin akçeyi mezkûr Siyavuş Ağa’ya ve karz olan otuz altı bin akçeyi mezbûr Musa Çelebi’ye def‘ ve teslîm edip bu vechile meblağayn-i mezkûrâna müte‘allika mezbûr Yusuf Bey üzerine bi vechin mine’l-vücûh da‘vâ ve hakkım kalmadı dedikde mezbûr Yusuf Bey dahi mezbûr Ali Çelebi üzerine benim dahi bi vechin mine’l-vücûh ve sebebin mine’l-esbâb da‘vâ ve hakkım yokdur dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Seyfi Ali Ağa b. ( ), el-Hâc İbrahim Bey b. Kurd, Musa Odabaşı, Tezkireci Hasan Bey, Ali Bey b. Ahmed, Yusuf Çelebi b. ( ) tâbi‘-i Osman Çavuş.