Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 212 Hüküm no: 228 Orijinal metin no: [53a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Serâserci Mihal v. Dimitri’nin borç verdiği Davud Ağa ve Ali Bey’den alacağı kalmadığı Mahmiye-i İstanbul’da Balat kapısı dâhilinde Ohri mahallesi sükkânından Serâserci Mihal v. Dimitri nâm zimmî meclis-i şer‘-i şerîfde işbu râfi‘ül-kitâb Tokadî Mustafa Ağa b. el-Hâc Murad Çavuş mahzarında tav‘an ikrâr ve takrîri kelâm edip elviye-i ekrâddan sâbıkan Hazo sancağında olan Davud Bey b. Murad Hân Bey’in kethüdâsı olan Ali Bey b. Mehmed nâm kimesneye bundan akdem beş bin yüz on riyâlî kuruş kıymetli un ve cins ve zirâ‘ı beynimizde ilm-i şer‘î ile ma‘lûm yedimde mülküm ve hakkım olan serâserimi beş bin yüz on beş riyâlî kuruşa bey‘ ve teslîm edip ol dahi minvâl-i muharrer üzre iştirâ ve tesellüm ve kabz ve tesellüm eyledikden sonra mülkünden ihrâc ile istihlâk etmeğin semen-i merkūm beş bin yüz on beş riyâlî kuruşa mezbûr Mustafa Ağa tarafeynden emir ve kabûlü hâviye kefâletiyle kefîl olmuşidi. Hâlâ meblağ-ı mezbûr beş bin yüz on beş riyâlî kuruşu asıl-ı merkūm Ali Bey vekîl-i mersûm Mustafa Ağa yedlerinden bi’d-defa‘ât tamâmen ahz u kabz eyledim. Min ba‘d mezbûrân Ali Bey ve Mustafa Ağa zimmetlerinde bi hükmi’l-vekâlet ve’l-kefâlet bir habbe hakkım kalmadı dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve elf. Şuhûdü’l-hâl: İbrahim Efendi b. Mehmed, Sefer Bey b. Mustafa, Satır Mustafa Ağa b. Süleyman, Mehmed Çavuş, Mahmud b. Osman.