Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 215 Hüküm no: 233 Orijinal metin no: [54a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Bağdâdî Hüseyin’in menzil hissesini diğer vârisler Canfeda bt. Abdullah ve Hatice bt. Hasan Çavuş’a sattığı Mahmiye-i İstanbul’da Hoca Rüstem mahallesinde sâkin iken vefât eden Ebûbekir Çelebi b. Bağdâdî Hüseyin Ağa’nın verâseti vâlidesi [Ca]nfedâ Hâtun bt. Abdullah ve li üm kız karındaşı Hatice bt. Hasan Çavuş nâm sagīreye ve li eb er karındaşı Mehmed Çelebi’ye münhasıra olduğu ve terekesi dahi altı sehim i‘tibâr olunup sihâm-ı mezbûreden bir sehimi merkūme Canfedâ Hâtun ve bir sehimi dahi sagīre-i mezbûre Hatice ’ye ve dört sehimi dahi mezbûr Mehmed Çelebi’ye isâbet ve intikāl eylediği şer‘an mütehakkık oldukdan sonra mezbûr Mehmed Çelebi meclis-i hatîrde sagīre-i mezbûre Hatice ’nin babası ve velîsi olup ve mezbûre Canfedâ Hâtun tarafından dahi husûs-ı âti’l-beyâna vekîl olup bimâ-hüve nehcü’s-sübût şer‘an vekâleti sâbite olan işbu râfi‘ü’l-vesîka mezbûr Hasan Çavuş mahzarında bi’t-tav‘i’s-sâf ikrâr ve i‘tirâf edip bir tarafı Ahmed Ağa b. ( ) el-müteferrika tasarrufunda olan menzile ve bir tarafı Musâhib Ali Ağa mülküne ve bir tarafı tarîk-i hâssa ve bir tarafı tarîk-i âmma müntehî menzil babam mezbûr Bağdâdî Hüseyin Ağa’nın mülkü olmağla babam mezbûr Hüseyin Ağa’nın hâl-i hayâtında ve nefâz-ı tasarrufâtında mârrü’z-zikr menzilin muhavvata-i dâhiliyesi cemî‘ müştemilâtı ve âffe-i hukūk ve merâfıkı ile bana ve muhavvata-i hâriciyesini dahi dört bâb fevkānî odaları ve bir sofa ve dehlizi ve [fe]vkānî ve kenîfi ve ahûru ve arpa odası ve tahtânî ve kenîfi ile ve âmme-i menâfi‘ ve merâfıkı ile karındaşım müteveffâ-yı mezbûr Ebûbekir Çelebi’ye hibe ve temlîk ve teslîm edip biz dahi ittihâb ve temellük ve tesellüm edip taht-ı yedimize dâhil oldukdan sonra merkūm Ebûbekir Çelebi dahi vefât edip mârrü’z-zikr muhavvata-i hâriciyenin altı sehimden dört sehm-i şâyi‘i mezbûre Canfedâ Hâtun’a ve bir sehm-i şâyi‘i dahi sagīre-i mezbûre Hatice ’ye isâbet ve intikāl eyledikden sonra hâlâ zikr olunan muhavvata-i hâriciye-i mezkûreden bana isâbet eden dört sehm-i şâyi‘i hisse-i şer‘iyyemi cemî‘ hukūk ve merâfıkı ile merkūme Canfedâ Hâtun’a ve merkūm Hasan Çavuş’a sekiz bin fıddî râyic fi’l-vakt akçeye bey‘-i bâtt-ı sahîh ile bey‘ ve teslîm edip mezbûre Canfedâ Hâtun nefsiyçün asâleten ve mezbûre Hüseyin Çavuş dahi sagīre-i merkūme Hatice için velâyeten iştirâk-i seviyy üzre iştirâ ve tesellüm ve kabûl eylediklerinden sonra semen-i mezbûr sekiz bin akçeyi merkūmân yedlerinden tamâmen ahz u kabz eyleyip zikr olunan cemî‘ muhavvata-i hâriciye-i mezbûre Canfedâ hâtunun ve sagīre-i mezbûre Hatice ’nin mülk ve haklarıdır. Benim bi vechin mine’l-vücûh alâka ve hakkım yokdur dedikde, mukırr-ı mezbûru ikrâr-ı meşrûhunda merkūm Hasan Çavuş vekâleten ve velâyeten vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ ve’l-ışrîn min şehr-i Rebî‘ulâhir li sene tis‘a ve hamsîn ve elf. Şuhûdü’l-hâl: Fahrü’l-emâsil ve’l-akrân Behlül Ağa b. Abdullah el-müteferrika, Ebûbekir Çelebi b. Murad, Mahmud Çelebi b. İsmail, Hamza Çelebi, Süleyman Halîfe b. Yusuf el-müezzin.