Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 217 Hüküm no: 236 Orijinal metin no: [54b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ali’nin, vakıf menzilini Emine bt. Mustafa’ya devrettiği Mahmiye-i İstanbul’da Aksaray’da Camcılar mahallesinde sâkin Mehmed Çelebi b. Ali meclis-i şer‘-i hatîrde işbu râfi‘ü’l-vesîka Emine bt. Mustafa nâm hâtun mahzarında tav‘an ikrâr ve i‘tirâf edip Sürre emîni İsmail Efendi Vakfı olup icâre-i mu‘accele ve yevmî iki akçe icâre-i müeccele ile zikri âtî akdin sudûruna değin yedimde ve taht-ı tasarrufumda hakk-ı müfevvezim olup mahalle-i mezkûrede vâki‘ bir tarafı Kağıdçı Mehmed Çelebi b. ( ) tasarrufunda olan odaya ve bir tarafı Nalband ( ) b. ( ) tasarrufunda olan menzile ve bir tarafı yine vakf-ı mezkûrdan olup ( ) b. ( ) tasarrufunda olan odaya ve bir tarafı tarîk-i âmma müntehî olan iki bâb fevkānî ve bir bâb tahtânî odaları ve kenîfi müştemil cemî‘ menzili kâffe-i hukūkuyla mezbûre Emine Hâtun’a üç yüz riyâlî kuruş mukābelesinde mütevellî-i vakf-ı mezkûre ma‘rifetiyle ferâğ ve tefvîz ve teslîm eyledim. Ol dahi tefevvüz ve tesellüm ve kabûl eyleyip mukābele-i ferâğ olan üç yüz riyâlî kuruşdan altmış riyâlî kuruşu mezbûre Emine Hâtun yedinden ahz u kabz eyledim dedikde, mezbûre Emine Hâtun dahi cihet-i mezkûreden merkūm Mehmed Çelebi’ye iki yüz kırk riyâlî kuruş zimmetinde deyni bâkī olduğunu tav‘an ikrâr edicek, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Salih Efendi el-müezzin, Mehmed Çelebi b. ( ), Abdülvehhâb Efendi b. Abbas el-kâtib, Mehmed b. Abdülgaffâr el-Kubânî