Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 218 Hüküm no: 237 Orijinal metin no: [55a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Hasan’ın, yurt yeri ve tarlalarının tasarruf hakkını Mehmed Bey b. Ali, Ali b. Mehmed ve sâirlerine devrettiği Vilâyet-i Rumeli’nde Avlonya sancağında Premedi kazâsına tâbi‘ Venişe? nâm karyeden olup hâlâ medîne-i Hâssa’da Suyolu odasından Mehmed Bey b. Hasan ve Durmuş meclis-i şer‘-i şerîf-i hatîr-i lâzımü’t-tevkīrde karye-i mezbûrdan Mehmed Bey b. Ali ve Ali b. Mehmed b. Hasan ve Durmuş b. Hasan ve Ahmed b. Mustafa ve Mehmed b. Davud ve Mustafa b. Hüseyin nâm kimesneler mahzarında karye-i mezbûreden Koca Durmuş b. Abdullah tarafından dahi âti’l-beyâna vekîl olup vekâleti bimâ-hüve nehcü’s-sübût şer‘an sâbite olan Ali Beşe b. ( ) mahzarında tav‘an ikrâr ve i‘tirâf edip [âtî] zikri akdin sudûruna değin yedimde ve taht-ı tasarrufumda muntazam mülk ve hakkım olup karye-i sâlifü’l-beyân dâhilinde vâki‘ bir tarafı mezbûr Koca Durmuş mülküne ve bir tarafı Mehmed b. Ali mülküne ve bir tarafı mezbûr Durmuş b. Hasan mülküne ve bir tarafı mezbûr Mustafa b. Hüseyin mülküne muttasıl cemî‘ yurt yerini cemî‘ tevâbi‘ ve levâhıkı ve kâffe-i hukūk ve merâfıkı ile ve yine karye-i mezbûre kurbunda Lefdova? nâm mevzi‘de vâki‘ lede’l-ahâlî ma‘lûmü’l-hudûd bir kıt‘a bağımı kâffe-i hukūkuyla ve yine karye-i mezbûrede Mecdumlar? nâm mevzi‘de vâki‘ lede’l-ahâlî ma‘lûmü’l-hudûd bir kıt‘a bağımı kâffe-i hukūkuyla ve yine karye-i mezbûrede İşnekule? nâm mevzi‘de vâki‘ lede’l-ahâlî ma‘lûmü’l-hudûd bir kıt‘a bağımı kâffe-i hukūkuyla ve yine karye-i mezbûrede Petriçe nâm mevzi‘de vâki‘ lede’l-ahâlî ma‘lûmü’l-hudûd bir kıt‘a bağımı kâffe-i hukūkuyla ve yine mezkûre Mustafa b. Hüseyin’in menzili kurbunda vâki‘ lede’l-ahâlî ma‘lûmü’l-hudûd bir kıt‘a bostanımı dahi kâffe-i hukūkuyla ve yine mezkûr Koca Durmuş menzili kurbunda vâki‘ lede’l-ahâlî ma‘lûmü’l-hudûd bir kıt‘a bostanımı dahi kâffe-i hukūkuyla mezkûrdan Mehmed b. Ali ve Ali b. Mehmed’e ve Mehmed b. Hüseyin’e ve Durmuş b. Hasan’a ve Ahmed b. Mustafa ve Mehmed Davud ve Mustafa b. Hüseyin’e ve Ali Beşe b. Abdullah’a on bin beş yüz cedîd râyic fi’l-vakt akçeye safka-i vâhide ile tarafeynden îcâb ve kabûlü hâvî bey‘-i bâtla asliyyûn-ı mezkûrdan asâleten ve vekîl-i mezkûr Ali Beşe b. Abdullah vekâleten zikr olunan cemî‘ emlâkı minvâl-i meşrûh üzre iştirâ eyledikden gayrı yine karye-i mezbûre sınırı dâhilinde Petretli nâm mevzi‘de vâki‘ lede’l-ahâlî ma‘lûmü’l-hudûd bir kıt‘a tarlayı ve yine mevzi‘-i mezbûre kurbunda vâki‘ Hoca Durmuş menziline muttasıl bir kıt‘a tarlamı ve yine karye-i mezbûrede Kara Şabanca nâm mevzi‘de vâki‘ lede’l-ahâlî ma‘lûmü’l-hudûd bir kıt‘a tarlamı ve yine mevzi‘-i mezbûr kurbunda Kirazlık demekle ma‘rûf mahalde vâki‘ lede’l-ahâlî ma‘lûmü’l-hudûd bir kıt‘a tarlamın dahi hakk-ı tasarrufunu sâhib-i arz ma‘rifetiyle asliyyûn-ı mezkûrûn Mehmed b. Ali ve Ali b. Mehmed’e ve Mehmed b. Hüseyin’e ve Durmuş b. Hüseyin’e ve Ahmed b. Mustafa b. Davud ve Mustafa [b.] Hüseyin’e ve vekîl-i mezkûr Ali Beşe b. Abdullah’a bin beş yüz cedîd râyic fi’l-vakt akçe ki cem‘an on üç bin akçe eder, yedlerine safka-i vâhide ile ferâğ ve tefvîz, onlar dahi tefevvüz edip ve mukābeleten bedel-i ferâğ olan meblağ-ı mezkûr bin beş yüz akçeyi ve semen-i mezkûr on bir bin beş yüz akçeyi ki cem‘an on üç bin akçe eder yedlerinden tamâmen ahz u kabz edip zikr olunan yurt yeri ve tarlaları cemî‘ hukūkuyla mahallinde zabt ve tasarrufa mezbûrûnu taslît eyledim dedikde, mukırr-ı mezbûrun vech-i muharrer üzre cârî ve sâdır olunan ikrâr-ı meşrûhunu el-mukırrûn lehü’l-mezkûrûn bi’l-vekâle vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Li sene 1059. Şuhûdü’l-hâl: Mustafa Efendi b. Abdurrahman, Durmuş b. Mehmed, Hasan b. Kurd, Mehmed b. Ali, Aydın Beşe b. Hüseyin, Ali b. Mehmed b. Şüdrânî, Yahya [b.] Zekeriya.