Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 219 Hüküm no: 238 Orijinal metin no: [55b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. David v. Avraham’ın, vefat eden Süleyman Ağa b. Ahmed’de olan alacağının terekesinden tahsiline karar verildiği Mahmiye-i İstanbul’da Frenk mahallesinde sâkin olup Portakal cemâ‘atinden David v. Avraham nâm Yahudi meclis-i şer‘-i hatîr-i lâzimü’t-tevkīrde mahmiye-i mezbûrede Nevbahar mahallesinde sâkin iken vefât eden Süleyman Ağa b. Ahmed’in zâhirde vâris-i ma‘rûfu olmamağla hâlâ Beytülmâl-ı Râcilîn emîni olup muhallefâtına vaz‘-ı yed eylediği şer‘an sâbit olan İlyas Ağa b. sinan tarafından husûmet-i âti’l-beyâna vekîl olup vekâleti nehc-i şer‘î üzre sâbit olan Mehmed Beşe b. Mustafa mahzarında üzerine takrîr-i da‘vâ edip bin otuz yedi senesinin Şevvâlü’l-mükerreminde hâlâ eydî-i nâsdan te‘âtîsi munkatı‘a olan züyûf akçe ile altın yüz seksen akçeye râyic iken müteveffâ-yı mezbûr Süleyman Ağa hâl-i sıhhat ve nefâz-ı tasarrufâtında yedimden iştirâ ve kabz eylediği ma‘lûmü’l-levn ve’l-cins ve’z-zirâ‘ emti‘a-i mütenevvi‘a semeninden on bir bin otuz züyûf akçe ve bir def‘a dahi yedimden müşterâ ve makbûz emti‘a semeninden dokuz bin cedîd râyic fi’l-vakt akçe cem‘an yirmi bin otuz akçe hakkım olup kable’l-vefât hâl-i nefâz ve tasarrufunda minvâl-i meşrûh üzre deyni olduğunu alâ ru’ûsi’l-işhâd ikrâr dahi eylemişdir. Hâlâ meblağ-ı mezbûru kable’l-îfâ vefât edip zimmetinde hakkım kalmağın semen-i evvel on bir bin otuz züyûf akçenin altından kıymet-i şer‘iyyesi olan altmış bir altın ve rub‘ altın hakkım ile dokuz bin cedîd râyic fi’l-vakt akçe hakkımın tereke-i vâfiyyesinden alıverilmesin taleb ederim. Vekîl-i mezbûr Mehmed Beşe’ye suâl olunsun dedikde, gıbbe’s-suâl vekîl-i mezbûr Mehmed Beşe müteveffâ-yı mezbûrun muhallefâtına müvekkili Emîn-i mezbûrun vaz‘-ı yed eylediğini ikrâr edip lâkin deyn-i mezbûru inkâr edicek, müdde‘î-i mezbûr David’den müdde‘âsını mübeyyin beyyine taleb olundukda zikr olunan Nevbahar mahallesi sükkânından Mehmed Çelebi b. Ahmed ve Ahmed Beşe b. Mustafa nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd her biri şehâdet edip fi’l-hakīka müteveffâ-yı mezbûr Süleyman Ağa hâl-i sıhhat ve nefâz-ı tasarrufâtında bizim huzûrumuzda bin otuz bir senesi Şevvâli’nde hâlâ eydî-i nâs[dan] te‘âtîsi munkatı‘a züyûf akçe ile altın yüz seksen akçeye râyic iken işbu david’den iştirâ ve kabz eylediğim emti‘a-i mütenevvi‘a semeninden on bir bin otuz züyûf akçe ile bir def‘a dahi iştirâ ve kabz eylediğim emti‘a semeninden dokuz bin akçe cem‘an yirmi bin otuz akçe işbu müdde‘î David v. Avraham Yahudi’ye deynim vardır deyû kable’l-vefât hâlâ tasarrufunda tav‘an ikrâr eyledi. Bu vechile semen-i evvel on bir bin otuz züyûf akçenin altından kıymet-i şer‘iyyesi olan altmış bir altın ve rub‘ altın ve dokuz bin cedîd akçenin işbu müdde‘iye tereke-i müteveffâ-yı mezbûrdan edâsı vâcibdir ve bu husûsa şâhidleriz şehâdet dahi ederiz deyû her biri münkir-i mezbûr muvâcehesinde edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra [56a] mezbûr David’e meblağayn-i mezbûreyni müteveffâ-yı mezbûrun hâl-i hayâtında küllen ve ba‘zan yedinden veya vekîli yedinden ahz eylemediğine veya âhara havâle etmediğine veya hibe veya taraf-ı şer‘iyyeden bir tarîk ile deynini ibrâ etmediğine yemîn teklîf olundukda ol dahi hasbe’l-mes’ûl yemîn billâh ellezî enzele’t-tûriyye alâ Musa aleyhi’s-selâm etmeğin şehâdet mûcebince meblağayn-i mezbûreyn altmış bir altın ve rub‘ altın ile dokuz bin cedîd akçenin tereke-i mezbûrdan edâsına vekîl-i mezbûr mahzarında müteveffâ-yı mezbûr üzerine hükm olunup, mâ vaka‘a bi’t-taleb ketb olundu. Hurrire fî selhi Rebî‘ulâhir li sene 1059. Şuhûdü’l-hâl: Ahmed Efendi b. Abdülbâkī, Osman Çelebi b. Mehmed, İbrahim Efendi b. Şaban.