Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 221 Hüküm no: 239 Orijinal metin no: [56a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müslüman olarak Ali ismini alan Yahudi Yasef’in, ailesi üzerinde herhangi bir alacağı kalmadığı Fi’l-asl Edirne cemâ‘atinden kable’l-islâm ismi Yasef olup hâlâ şeref-i İslâm ile müşerref olan Ali nâm şâbb-ı âkil ve bâliğ ve reşîd meclis-i şer‘de mezkûrun babası olup kendi tarafından asıl ve zevcesi Efendepolo bt. Zaharya tarafından husûsu âti’l-beyâna vekîl olup vekâleti bimâ-hüve nehcü’s-sübût şer‘an sâbite olmağla vekâleten, Yahudagor? v. Menahim ve ammi İlya v. Mehanim nâm Yahudiler muvâcehelerinde tav‘an ikrâr ve i‘tirâf edip mezbûr Yahudagor’ın zimmetinde cihet-i deyn-i şer‘îden iki yüz kıt‘a riyâlî kuruş hakkım olup meblağ-ı mezbûrun yüz yetmiş riyâlî kuruşunu bundan akdem mezbûr Yahudagor’dan ahz u kabz edip zimmetinde otuz kuruş hakkım kalmışdı. El-hâletü hâzihî meblağ-ı bâkī-i mezbûr otuz kıt‘a riyâlî kuruşu dahi babam mezbûr Yahudagor yedinden ahz ve istîfâ eylediğimden sonra vâlidem merkūme Efendepolo zimmetinde dahi cihet-i deyn-i şer‘îden on beş riyâlî kuruş hakkım olunduğundan mâ‘adâ vâlidem mezbûre yedinde bir sîm kuşağım vedî‘a olup hâlâ hakkım olan meblağ-ı mezkûr on beş riyâlî kuruşu vâlidem mezbûr yedinden ahz u kabz edip mârrü’z-zikr kuşakdan berî olup vâlidem mezbûrenin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim. Min ba‘d mezbûr Yahudagor üzerine ve vâlidem mezbûre Efendepolo üzerine ve ammim mezbûr İlya üzerine ve zevcesi Arhondi Polo Şabatay üzerine ve er karındaşlarım Menahim ve Mosi üzerlerine ve kız karındaşım Kavro üzerlerine bi vechin mine’l-vücûh da‘vâ ve hakkım yokdur. Kâffe-i da‘vâdan her birilerinin zimmetlerini ibrâ ve iskāt eyledim dedikde, gıbbe’t-tasâduki’l-vicâhi’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min şehri Rebî‘ulâhir li sene 1059. Şuhûdü’l-hâl: Ahmed Çelebi b. Abdülkerim, el-Hâc Ali b. Osman, Yahya Bey b. Zekeriya.