Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 226 Hüküm no: 248 Orijinal metin no: [57b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çakşır Süleyman Çavuş b. Abdullah’a olan borcunu ödemesi hususunda Şevki oğlu Süleyman’a tenbihte bulunulduğu Mahmiye-i İstanbul’da Azebler kurbunda sâkin işbu sâhibü’l-kitâb Cemşûr Süleyman Çavuş b. Abdullah meclis-i şer‘-i hatîr-i lâzımü’t-tevkīrde vilâyet-i Anadolu’da vâki‘ kasaba-i Menemen ahâlîsinden Şevki oğlu Süleyman mahzarında üzerine takrîr-i da‘vâ edip mezbûr Süleyman Beşe zimmetinde cihet-i deyn-i şer‘îden üç yüz on sekiz buçuk riyâlî kuruş ve rub‘ kuruş hakkım olup meblağ-ı mezbûrdan iki yüz riyâlî kuruşunu bundan akdem Solak Ali Çelebi yediyle ahz u kabz edip hâlâ meblağ-ı mezbûrdan bâkī yüz on sekiz buçuk riyâlî kuruş ve rub‘ kuruş hakkımı vermede ta‘annüd eder. Suâl olunup alıverilmesini taleb ederim dedikde, gıbbe’s-suâl mezbûr Süleyman Beşe cevâbında fi’l-hakīka müdde‘î-i merkūm Süleyman Çavuş’a vech-i muharrer üzre cihet-i deyn-i şer‘îden üç yüz on sekiz buçuk riyâlî kuruş ve rub‘ kuruş zimmetimde lâzımü’l-edâ deynim olup meblağ-ı mezbûrdan iki yüz riyâlî kuruşu Solak Ali Çelebi yediyle def‘ ve teslîm eyledim. Bâkī yüz on sekiz buçuk kuruş ve rub‘ kuruş zimmetimde merkūm Süleyman Çavuş’a lâzımü’l-edâ ve vâcibü’l-kazâ deynim bâkī kalmışdır deyû tav‘an ikrâr edicek, mûcebince meblağ-ı mezbûr yüz on buçuk riyâlî kuruş ve rub‘ kuruşu müdde‘î-i mezbûra edâ ve teslîme merkūm Süleyman Beşe üzerine hükm olunup mâ vaka‘a bi’t-taleb ketb olundu. Fi’l-yevmi’s-sâlis min Cumâdelûlâ sene 1059 Şuhûdü’l-hâl: Hasan Çelebi b. Mehmed, Halil Ağa b. Ali?, Ahmed Beşe b. Zülfikār el-mübâşir, Mehmed Beşe b. Mustafa, el-Hâc Mehmed Halîfe el-müezzin.