Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 227 Hüküm no: 249 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Hacı Reis ile kızı Rukiye’nin evlerini Hüdaverdi Vakfı’na istiğlâl suretiyle sattıkları Mahmiye-i İstanbul’da Mehmed Paşa Câmi‘-i şerîfi kurbunda sâkine Ayşe bt. el-Hâc Reis ile sadriye kebîre kızı Rukiye Hâtun bt. Hamamcızâde Ahmed nâm hâtunlar meclis-i şer‘-i hatîr-i lâzımü’t-tevkīrde Hüdâverdi Vakfı’na bi’l-fi‘l berât-ı âlî ile mütevellî olan işbu râfi‘ül-kitâb Halîfe b. Seyfullah mahzarında her biri tav‘an ikrâr ve i‘tirâf edip işbu akdin sudûruna değin silk-i mülk ve yedimizde münselik mülk ve hakkımız olup vilâyet-i anadolu’da vâki‘ Yalakâbâd kazâsına tâbi‘ Kocaderesi nâm karyede vâki‘ bir tarafı Çayderesi demekle ma‘rûf dereye ve bir tarafı tarîk-i hâssa muttasıl mülk menzilimi cemî‘ tevâbi‘ ve levâhıkı ve kâffe-i hukūk ve merâfıkı ile gıbbe’t-tahliyeti’ş-şer‘iyye ve’t-tekābuzi’l-mer‘î mütevellî-i mezbûr Hüdâverdi’ye altmış iki buçuk kıt‘a riyâlî kuruşa bi tarîki’l-istiğlâl bey‘ ve teslîm edip ol dahi bi’t-tevliye mâl-ı vakf-ı mezbûr ile vakf-ı merkūm için iştirâ ve tesellüm ve kabûl eyledikden sonra mütevellî-i mezbûr menzil-i mahdûd-ı mezbûru târih-i kitâbdan bir sene tamâmına değin yedi yüz elli fıddî râyic fi’l-vakt akçeye bize îzâr ve teslîm edip biz dahi vech-i muharrer üzre istîcâr ve tesellüm ve kabûl eyledik dediklerinde mukırretân-ı mezbûretân ikrâr-ı meşrûhlarında mütevellî-i merkūmu vicâhen tasdîk edicek, mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn Rebî‘ulâhir sene 1059. Şuhûdü’l-hâl: Osman Efendi b. el-kadı, İsmail Beşe râcil, İsa Çelebi b. Ahmed.