Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 228 Hüküm no: 251 Orijinal metin no: [58b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bergam v. adlı Ermeni’nin vârislerinin, vasîleri Karabet v. Hasro’dan haklarını tamâmen aldıkları Mahmiye-i İstanbul’da İnebey mahallesinde sâkin iken hâlik olan Bergam v. ( ) nâm Ermeni zimmînin verâseti zevce-i metrûkesi Meyrem bt. Mirkom, kebîr oğlu Asodor ve kebîre kızı Maruta? ve sagīr oğlu Simo ve sagīre kızı Kadota’ya münhasıra olup tereke-i hâlik-i merkūm kırk sekiz sehim i‘tibâr olunmağın sihâm-ı mezkûreden altı sehimi merkūme ve on dörder sehimi mezbûrân Asodor, Simo’ya ve yedişer sehimi mezbûretân Maruta? ve Kadota’ya isâbet eylediği şer‘an mütehakkık oldukdan sonra mezbûrân Asodor ve Maruta asâleten ve mesfûre Meyrem tarafından asâleten ve sagīrân-ı mezbûrân Simo ve Kadota taraflarından tesviye-i emirlerine kıbel-i şer‘den mansûbe vasîleri olmağla vesâyeten meclis-i şer‘-i hatîr-i lâzımü’t-tevkīrde işbu râfi‘ül-kitâb Karabet v. Hasro nâm Ermeni zimmî mahzarında herbiri tav‘an ikrâr ve i‘tirâf edip mezbûr Bergam hâlik olduğu hâlde evlâdı mezbûrûn Asodor ve Maruta ve Simo ve Kadota’nın cümlesi sagīrler olmağla tesviye-i emirlerine mezbûr Karabet vasî nasb oldukda ber-mûceb-i defter-i müfredât-ı kassâm ba‘de ihrâc resmü’l-kısme ve harcü’l-mahkeme hâlik-i mezbûrun vereseye intikāl eden cemî‘ terekesi yüz bin üç yüz cedîd râyic fi’l-vakt akçe olup vasiyy-i evvel-i mezbûr Karabet’in makbûzu oldukdan sonra bizim ve sagīrân-ı mezbûrânın süknâları olmamağla mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd cemî‘ menzili bizim için ve sagīrân-ı mezbûrân için Maruta ve Asodor’un bülûğlarından sonra mâlikesi Siyavuş bt. Abdullah nâm hâtundan seksen beş bin fıddî cedîd râyic fi’l-vakt akçeye iştirâ ve tesellüm edip vasiyy-i evvel-i mezbûr Karabet yedinde olan yüz bir üç yüz akçeden yedinden seksen beş bin cedîd akçeyi ahz eylediğimizden sonra meblağ-ı mezbûru bâyi‘a-i mezbûreye teslîm eyledik. Merkūm Karabet’in yedinde meblağ-ı mezbûr yüz bin üç yüz akçeden ancak on beş bin üç yüz akçe kalmışdı. Hâlâ meblağ-ı bâkī on beş bin üç yüz cedîd akçenin sihâm-ı mezbûreden mezbûr Asodor on dört sehim hissesi mukābelesinde kendiye isâbet eden dört bin dört yüz altmış iki cedîd akçe hakkını asâleten ve merkūme Maruta dahi sihâm-ı mezbûreden yedi sehim hissesi mukābelesinde kendiye isâbet eden bin dokuz yüz on iki akçe hakkını asâleten ve sagīr-i mezbûr Simo’nun on dört sehim hissesi mukābelesinde [dört] bin dört yüz altmış iki akçe hakkını ve sagīre-i mezbûrân Kadota’nın? yedi sehim hissesi mukābelesinde isâbet eden iki bin iki yüz otuz bir akçe hakkını vesâyeten alıp kabz edip min ba‘d merkūm Karabet yedinde tereke-i hâlik-i merkūmdan bir akçe ve bir habbe bâkī kalmamışdır dediklerinde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Ahmed Efendi b. Abdülbâkī, Osman Çelebi b. Mehmed, Mustafa Çelebi b. Abdurrahman, İsa b. Ahmed, Asodor v. Agob, Asodor v. Yani, Kirkor v. Kireso?