Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 229 Hüküm no: 252 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Abdullah’ın, Hüseyin Beşe b. Ali’ye olan borcuna karşılık menzil, dükkân, bağ ve bahçesini rehin verdiği Medîne-i Belgrad’da Hasan Ağa mahallesi sükkânından olup Otuz Sekizinci Ağa Bölüğü odasından olan Hasan Beşe b. Abdullah nâm râcil meclis-i şer‘-i hatîr-i lâzımü’t-tevkīrde zikr olunan odanın odabaşısı olan el-Hâc Hüseyin Ağa b. Abdullah tarafından ikrâr-ı âti’l-beyânı tasdîka vekîl olup vekâleti bimâ-hüve nehcü’s-sübût şer‘an sâbite olan Hüseyin Beşe b. Ali mahzarında tav‘an ikrâr ve i‘tirâf edip mûmâ-ileyh el-Hâc Hüseyin Ağa’ya cihet-i karz-ı şer‘îden bin dört yüz riyâlî kuruş ve semeni târih-i kitâbdan yüz seksen gün tamâmına değin müeccel yedinden müşterâ ve makbûz yeşil merdâne iskarlat çuka ferâceye kaplı samur kürk bahâsından yüz elli riyâlî kuruş cem‘an bin beşyüz elli riyâlî kuruş zimmetimde vâcibü’l-edâ ve lâzımü’l-kazâ deynim olup meblağ-ı mezbûr beş yüz elli riyâlî kuruş deynim mukābelesinde yedimde mülküm ve hakkım olup mahalle-i mezbûrede vâki‘ iki tarafı Afyonzâde Dâmâdı demekle şehîr Mustafa mülküne ve bir tarafı tarîk-i hâssa ve bir tarafı tarîk-i âmma müntehî cemi‘ menzilimi hukūkuyla ba‘de’t-tahliye ve medîne-i mezbûrede Kuyumcular sûkunda vâki‘ bir tarafı Hacı Ali Bey ( ) mülküne ve bir tarafı Çizmeci Halil mülküne ve iki tarafı tarîk-i âmma müntehî cemî‘ kuyumcu dükkânını ve yine medîne-i mezbûrede Kosko Mehmed Paşa mahallesinde vâki‘ bir tarafı Ebûbekir Çelebi b. ( ) mülküne ve bir tarafı Hacı Rıdvan b. Abdullah mülküne ve bir tarafı mezbûr Çizmeci Halil mülküne ve bir tarafı mukābir-i kefereye muttasıl bir kıt‘a cemî‘ bağım ile bir kıt‘a cemî‘ bahçemi mezbûr el-Hâc Hüseyin Ağa’ya rehin vaz‘-ı yed edip ol dahi minvâl-i muharrer üzre irtihân ve kabûl eyledikden sonra rihân-ı mezbûreyi mahallinde kabza mûmâ-ileyh el-Hâc Hüseyin Ağa’yı taslît eyledim dedikde, gıbbe’t-tasdîki’ş-şer‘î medîne-i mezbûrede Aşağıhisar dâhilinde Hacı Veli mahallesinde sâkin Ahmed Çelebi b. Mehmed nâm râcil meblağ-ı mezbûr bin dört yüz elli riyâlî kuruşa tarafeynden emr ve kabûlü hâviye kefâletle kefîl olmağın mâ hüve’l-vâki‘ bi’t-taleb ketb olundu. Fi’l-yevmi’s-sâmin mine’l-Cumâdelûlâ li sene tis‘a ve hamsîn ve elf. Şuhûdü’l-hâl: Mehmed Beşe b. Receb, Mustafa Beşe b. Mehmed, Halil Efendi b. Ali el-kadı, Abdülkerim b. Yahya el-kayyum, Hacı Mehmed b. Abdullah.