Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 235 Hüküm no: 254 Orijinal metin no: [60b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eski Tunus Kadısı Mehmed Efendi’nin kahve ticaretinden borcunu Hacı Hüseyin b. Mehmed’e ödemesi gerektiği Rükn-i âlişân-ı sadr-ı âsaf-nişân vezîr-i ekrem müşîr-i efham, mümehhid-i bünyânü’d-devleti ve’l-ikbâl, müşeyyidi erkânü’s-saltanati ve’l-iclâl Mehmed Paşa hazretlerinin huzûr-ı ber-hubûrlarında beyne’l-ekâbir ve’l-e‘âlî akd-i meclis-i âlî olundukda medîne-i Trablusgarb sükkânından el-Hâc Hüseyin b. Mehmed nâm kimesne meclis-i ma‘kūd-ı mezbûrda sâbıkā Tunus kadısı olan Mehmed Efendi el-Ezherî mahzarında üzerine takrîr-i da‘vâ edip mezbûr Mehmed Efendi zimmetinde vakıyyesi beynimizde ilm-i şer‘î ile ma‘lûm yedinden müşterâ ve makbûz kahve semeninden üç yüz elli riyâlî kuruş hakkım olup yedime hat ve hatemi hâvî deyn tezkiresi vermişdir. Suâl olunup meblağ-ı mezbûr üç yüz elli riyâlî kuruş hakkımın alıverilmesin taleb ederim dedikde, gıbbe’s-suâl mezbûr Mehmed Efendi cevâbında fi’l-hakīka işbu müdde‘î el-Hâc Hüseyin’in yedinden müşterâ ve makbûzum olan vakıyyesi beynimizde ilm-i şer‘î ile ma‘lûm kahve semeninden üç yüz elli riyâlî kuruş deynim olup yedine dahi deyn tezkiresi vermişimdir. Lâkin meblağ-ı mezbûrun edâsı hîn-i istidâne ve kazâ-i Tunus’u tasarrufa müte‘allik olmuşidi. Ancak iki ay kazâ-i mezbûru zabt eyledim deyû tav‘an deyni olduğunu ikrâr edip ve dahi def‘-i sahîh beyânına kâdir olmayıp şer‘an zimmetine edâsı vâcib olmağla ikrârı mûcebince meblağ-ı müdde‘î üç yüz elli riyâlî kuruşun müdde‘î-i mezbûr el-Hâc Hüseyin’e edâsını merkūm Mehmed Efendi üzerine ilzâm olunup mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ulâhir sene 1059 Şuhûdü’l-hâl: Süleyman Ağa b. Pîrî, Mahmud Ağa b. Süleyman, İbrahim Bey b. Hasan.