Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 241 Hüküm no: 263 Orijinal metin no: [62b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Osman’ın bostanını içindeki alet ve tohumlarla beraber Dayko v. Ağnad’a kiraladığı Mahmiye-i İstanbul’da Esirci Kemal mahallesinde sâkin umdetü’l-emâcid ve’l-ekârim Mehmed Ağa b. Osman Ağa’nın vech-i câ’î üzre müste’ciri olan Dayko v. Ağnad meclis-i şer‘-i hatîr-i lâzımü’t-tevkīrde râfi‘ül-kitâb mûmâ-ileyh Mehmed Ağa mahzarında tav‘an ve rağbeten ikrâr ve i‘tirâf edip mûmâ-ileyh Mehmed Ağa merhûm kethüdâ Sinan b. Abdullah Vakfı olup icâre-i mu‘accele ve müeccele-i ma‘lûme ile yedinde ve tasarrufunda olup mahmiye-i mezbûrede Davud Paşa İskelesi’nde Avrat Pazarı kurbunda Kürkçü Başı mahallesinde vâki‘ bir tarafı Abdullah Ağa Vakfı olan bostana ve bir tarafı kale duvarına ve bir tarafı ba‘zan merhûm Sultan Süleyman Vakfı olan bostana ve ba‘zan Mehmed Efendi Vakfı bostana ve ba‘zan Hacı Veli b. Mehmed menziline ve bir tarafı tarîk-i âmma müntehî cemî‘ bostanı kâffe-i hukūkuyla ve yine yedinde mülkü olup bostan-ı mezkûr içinde mevcûd on yıl ve on üç büyük sepek ve sekiz tarak ve iki re’s bârgir ve sekiz küçük çapa ve iki büyük çapa ve sekiz demir kazık ve bir nühâs tencere ve on kofa ve dört arka sepeti ve iki gübre sepeti ve bir mîzân sepeti ve iki büyük fıçı ve dört küçük fıçı ve dört koğa ile bana dün hızır olup işbu bin elli dokuz şehr-i Rebî‘ulâhiri’nin yirminci gününden yine rûz-ı kâsım olup târih-i mezkûr Şevvâli’nin yirmi dokuzuncu gününe değin cem‘an yüz sekiz güne değin beher yevm yüz altmış yedişer fıddî râyic fi’l-vakt akçeye tarafeynden îcâb ve kabûlü hâvî icâre-i sahîha-i şer‘iyye ile îcâr ve teslîm edip ben dahi minvâl-i meşrûh üzre cemî‘ bostanı âlât-ı mezkûre ve bârgirleriyle istîcâr ve tesellüm eylediğimden sonra …? mûmâ-ileyh Mehmed Ağa yedinden mülk ve hakkı olan üç bin …? ma‘lûmü’l-mikdâr bağ sazımı ve bir vakıyye tere tohumunu ve beş vakıyye turp tohumu ve beş vakıyye semizotu tohumunu ve iki keyl isfanah tohumunu ve bir keyl mi‘de nüvaz tohumunun bana ikrâz-ı sahîh ile ikrâz ve teslîm edip ben dahi ikrâz ve tesellüm eyledim dedikde, mukırr-ı mezbûr Dayko’yu ikrâr-ı meşrûhunda el-mukırrûn lehü’l-mezbûr Mehmed Ağa vicâhen tasdîk ve şifâhen tahkīk eyledikden sonra mezkûr Dayko’nun kayın atası Andriye v. Kirko ve Viço v. Kirkor nâm zimmîler müddet-i meşrûhada olan ücrete ve büzûr-ı merkūmeye ve saz-ı mezkûre emr ve kabûlü hâviye kefâlet-i sahîha ile her biri kefîl olucak, mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Nasuh Efendi b. Musa el-müderris, Mehmed Efendi b. Gıyaseddin el-müderris, el-Hâc Hasan b. Mehmed, Ahmed Çelebi b. Mehmed el-müezzin, İsa b. Yusuf, Yusuf b. Abdullah, Ahmed b. Abdurrahman.