Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 242 Hüküm no: 264 Orijinal metin no: [63a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şehzede bt. Sefer’in evini istiğlâl yoluyla Kerime Hâtun Vakfı’na sattığı Mahmiye-i Kostantıniyye mahallâtından İnebey mahallesinde sâkine olan Şehzede bt. Sefer nâm zimmîyye meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf- hâzıra olup, âtiyyü’z-zikr menzilini, merhûme Kerime Hâtun Vakfı’na mütevellî olan râfi‘-i hâze’l-kitâb Mustafa Efendi [b.] Mehmed’e bey‘ ettiğini ikrâr ve i‘tirâf etti. Mütevellî-i mezbûr da, vakf-ı mezbûr malıyla ve istiğlâl maksadıyla, bâyi‘a-i mezbûrenin iş bu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu, mahalle-i merkūmede vâki‘, bir tarafdan Kara Yani v. Manolid mülkü, diğer tarafdan Yefram v. Menas mülkü, öteki tarafdan Markos v. Befzem mülkü ve diğer tarafdan da tarîk-i âm ile mahdûd olan cemî‘-i menzilini ve kezâ mahmiye-i mahallâtından Kâtib Kasım mahallesinde kâin, bir tarafdan Bevvâb-ı sultânî Cafer Bey mülkü, diğer tarafdan Kazal v. Muratca mülkü, öteki tarafdan kısmen Darya v. Yani ve kısmen Oz v. Serkis mülkleri ve diğer tarafdan da tarîk-i âm ile mahdûd cemî‘-i menzili cümle tevâbi‘ ve levâhıkı ve kâffe-i hukūku ve mürâfıkı ile râyicü’l-vakt üç yüz riyâlî kuruşa iştirâ etti. Bâyi‘a-i mezbûrenin menzileyn-i merkūmeyni kirâlamak istemesi üzerine mütevellî-i mesfûr, ba‘de’t-tahliye ve’t-tekābuz zeyl-i kitâbda mezkûr târihden i‘tibâren bir sene tamâmına kırk beş riyâlî kuruşa kirâya verdi. Vâki‘ ikrâr, mütevellî-i mesfûr tarafından vicâhen ve şifâhen tasdîk edildi. Sonra mukırra-i mezbûrenin zevci Azel v. Ferhad ve Agos v. Simavra ve Tarafende bt. Ferhad nâm zimmîler menzil-i mezbûrun derkine ve ücret-i merkūmeye îcâb ve kabûlü hâvî kefâletle kefîl oldular. Cerâ zâlike ve hurrire fi’l-yevmi’r-râbi‘ min şehri Cumâdelûlâ sene tis‘a ve hamsîn ve elf. Şuhûdü’l-hâl: İsa Beşe b. Ali, Ali b. Mehmed, Ramazan Efendi b. Mustafa, Ömer Halîfe b. Fazlullah el-müezzin