Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 243 Hüküm no: 265 Orijinal metin no: [63a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Mustafa’nın satın almış olduğu Emine bt. Hüseyin’in hür olduğundan serbest bırakılması Bundan akdem rıkkına inkıyâdı olduğu bimâ-hüve nehcü’s-sübût şer‘an sâbit ve mütehakkık olan işbu açık kaşlı gök elâ gözlü, orta boylu ak benizli Emine bt. Hüseyin nâm hürre mahmiye-i İstanbul’da Hoca Gıyaseddin mahallesinde umdetü’l-akrân Mehmed Efendi b. Mustafa tarafından husûs-ı âti’l-beyâna vekîl olup vekâleti Mehmed Bey b. Mustafa el-bevvâbü’s-sultânî ve Ali Bey b. Abdullah şehâdetleriyle sâbite olan Mehmed Ağa [b.] İbrahim nâm dizdârânın mahzarında üzerine takrîr-i da‘vâ edip ben mahmiye-i İstanbul’da Kapı kurbunda vâki‘ Yenikapı vâsılında Kurban mahallesinde mütevellid hürretü’l-asl olup anam işbu hâzır bi’l-meclis Fâtıma bt. Karakaş Hüseyin nâm hürredir. Babam mezbûr Hüseyin nâm hürdür. Ben zevcim olan Hamdi b. el-Hâc İsmail nâm kimesne tagallüben işbu hâzır bi’l-meclis Esir Ahmed Bey b. Mehmed’e târih-i kitâbdan bir buçuk sene mukaddem bey‘ edip ol dahi ba‘de’l-iştirâ işbu Mehmed Efendi’ye bey‘ edip ol dahi iştirâ ve tesellüm edip bana nâ-hak vaz‘-ı yed olup yed-i zâlimesi üzerimden izâle olunup sebîlim tahliye olunması matlûbumdur. Gıbbe’s-suâl vekîl-i mezbûr Mehmed Ağa cevâbında işbu Esirci Ahmed Bey Emine’yi yüz seksen riyâlî kuruşa mezbûr Hamdi’den iştirâ eyleyip mezbûr Ahmed Bey’den müvekkilem müşâr Mehmed Efendi üç yüz elli riyâlî kuruşa iştirâ ve tesellüm eyleyip işbu vechile müvekkilim müşârun-ileyhe refikadır. Vech üzre hürre idiği ma‘lûmum değildir dedikde mezbûre Emine’den da‘vâsına muvâfık beyyine taleb olundukda udûl-i ahrâr-ı müslimînden olup mahalle-i mezbûreden Ahmed Bey b. Mehmed ve Hüseyin Çavuş b. Hasan ve Hüseyin Bey b. İsmail ve mahmiye-i mezbûreden olup Nişancı mahallesinde sâkin Mehmed b. Mustafa nâm kimesneler meclis-i şer‘a li ecli’ş-şehâde hâzırûn olup fi’l-vâki‘ işbu mezbûre Emine mahallemiz Karabaş mahallesinden mütevellid Hürretü’l-asl olup anası işbu hâzıra bi’l-meclis Fâtıma [bt.] Karabaş Hüseyin hürredir. Babası Hüseyin nâm hürdür, sebîlî tahliye lâzımdır. Biz bu husûsa bu vech üzre şâhidleriz, şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a olucak şehâdet-i mezbûrûn mûcebince mezbûr Emine’nin hürriyetine hükm-i sahîh-i şer‘le hükm olunmağın, mâ hüve’l-vâki‘ bi’t-taleb ketb olundu. Hurrire fi’s-seb‘ min Cumâdelâhir li sene tis‘a ve hamsîn ve elf. Şuhûdü’l-hâl: Mehmed Çorbacı b. Mustafa, Ali Çavuş b. Mehmed, Mumcu Çelebi b. Veli, Ahmed Çelebi b. Sefer, Hüseyin b. Abdullah, Ahmed b. Abdurrahman.