Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 244 Hüküm no: 266 Orijinal metin no: [63b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ebü’l-fazl Mahmud Efendi b. Mehmed Efendi’nin çiftlik ve tarlalarının tasarruf hakkını Mehmed Beşe b. Cafer’e devrettiği Mahmiye-i İstanbul’da Muhtesib Karagöz mahalle[sinde] sâkin sadru’l-ulemâi’l-izâm bedrü’l-fuzalâi’l-fihâm keşşâfü’l-müşkilâti’d-dîniyye hallâlü’l-mu‘dilâti’l-yakīniyye câmi’ş-şerâyiti’l-garâ …? …? ilmü’l-ilm ve’l-hüdâ menârü’l-fazl ve’t-takâ el-mahfûf-ı bi sunûfı avâtıfi’l-meliki’l-mu‘în sâbıkā Rumeli Kazaskeri olan Ebü’l-fazl Mahmud Efendi b. el-müvellâ el-merhûm el-mebrûr ed-dâricü ilâ medârici rahmeti Rabbihi’l-gafûr Mehmed Efendi hazretleri taraf-ı karîni’ş-şereflerinden ikrâr-ı âti’l-beyâna vekîl olup Ahmed Efendi b. Mehmed el-müderris ve Mehmed Beşe b. Sinan şehâdetleriyle vekâleti sâbite olan Hasan Çavuş b. Hasan meclis-i şer‘-i hatîr-i lâzımü’t-tevkīrde işbu râfi‘ül-kitâb Mehmed Beşe b. Cafer nâm râcil mahzarında bi’l-vekâle tav‘an ikrâr ve takrîr-i kelâm edip müvekkil-i mûmâ-ileyh hazretleri vâlid-i mâcidleri merhûm-ı mezbûr Mehmed Efendi’den irs-i şer‘î ile intikāl edip işbu akdin sudûruna değin yedlerinde mülkü ve hakkı olup Hüdâvendigâr sancağında İnegöl kazâsına tâbi‘ Çeltikçi nâm karyede vâki‘ bir tarafı Himmet b. Osman mülküne ve bir tarafı Mercimekzâde Cafer mülküne ve bir tarafı Kara Hasan b. Abdullah mülküne ve bir tarafı tarîk-i âmma müntehî bir bâb fevkānî ve bir bâb tahtânî odaları dört ahûru ve havluyu ve dut bahçesini müştemil cemî‘ çiftlik ta‘bîr olunur menzilini âmme-i hukūkuyla merkūm Mehmed Beşe’ye on beş bin cedîd râyic fi’l-vakt akçeye tarafeynden îcâb ve kabûlü hâvî bey‘-i bâtla [bey‘] edip ol dahi minvâl-i meşrûh üzre iştirâ ve kabûl eyledikden sonra zikr olunan çiftlikde intimâ ile tahdîd ve tavsîfden müstağnî Türkan Deresi nâm mevzi‘de vâki‘ dokuz müd tohum isti‘âb eder bir kıt‘a ve çiftlik kurbunda vâki‘ dört müd tohum isti‘âb eder bir kıt‘a ve Siyavuş Ağa Tarlası kurbunda vâki‘ dört müd tohum isti‘âb eder bir kıt‘a ve Bahadır Yeri nâm mevzi‘de vâki‘ iki müd tohum isti‘âb eder bir kıt‘a ve Cerrâhköyü sınırında vâki‘ dört müd tohum isti‘âb eder bir kıt‘a cem‘an beşkıta tarlalarının dahi hakk-ı tasarrufunu sâhib-i arz ma‘rifeti ile mezbûr Mehmed Beşe’ye fıddî râyic fi’l-vakt on bin akçeye bedel <> mukābelesinde tefvîz ve ferâğ edip ol dahi tefevvüz ve kabûl eyledikden sonra semeni merkūm ve bedel-i merkūm cem‘an yirmi beşakçeyi müvekkil-i mûmâ-ileyh -esbağallâhu ni‘amehû aleyh- hazretleri merkūm Mehmed Beşe’nin yedinden tamâmen alıp kabz edip mârrü’z-zikr çiftlik ve tarlaları mahallinde ahz u kabza ve tasarrufa mezbûr mehmed Beşe’yi taslît eyledi. Ba‘de’l-yevm zikr olunan çiftlik mezbûr Mehmed’in mülk-i müşterâsı ve tarlalar dâhil-i taht-ı tasarrufu olmuşdur dedikde, gıbbe’t-tasdîki’ş-şer‘î bi’t-taleb ketb olundu. Fi’r-râbi‘ min Cumâdelûlâ li sene [tis‘a] ve hamsîn ve elf. Şuhûdü’l-hâl: Hacı Bekir b. Ramazan, Cafer Çelebi b. Mehmed, Ahmed Çelebi b. Abdülbâkī, Osman Çelebi b. Ahmed, Mehmed b. ( ).