Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 249 Hüküm no: 274 Orijinal metin no: [65a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mümine bt. İbrahim’in menzilini Hoca Üveys Mahallesi nakit vakfına istiğlâl suretiyle satması Mahmiye-i İstanbul’da Hoca Üveys mahallesinde sâkine Mümine bt. İbrahim Meclis-i şer‘-i hatîr-i lâzımü’t-tevkīrde mahalle-i mezkûre avârızına olan nukūdun meşrûtiyyet üzre bi’l-fi‘l mütevellîsi olan Seyyid Ömer Efendi b. es-Seyyid Hüseyin el-müezzin mahzarında tav‘an ikrâr ve i‘tirâf edip zikri âtî akdin sudûruna değin yedimde ve taht-ı tasarrufumda mülk ve hakkım olup mahalle-i mezkûrede vâki‘ bir tarafı medîne-i vakfına ve bir tarafı Şaban Beşe b. Abdullah mülküne ve bir tarafı tarîk-i âmma ve bir tarafı mahalle-i mezbûre mescidi müezzinine vakf olan menzile müntehî cemî‘ menzili kâffe-i hukūk ve merâfıkı ile mezbûr Seyyid Ömer Efendi’ye üç yüz kıt‘a riyâlî kuruşa bi tarîki’l-istiğlâl bey‘ ve teslîm eyledim. Ol dahi vakf-ı mezbûr malıyla vakıf için iştirâ ve tesellüm ve kabûl edip semen-i mezkûr üç yüz riyâlî kuruşu bana teslîm edip ben dahi yedinden tamâmen ahz u kabz eyledikden sonra mukırr-ı mezbûr Seyyid Ömer Efendi cemî‘ menzil-i mezkûru ba‘de’t-tahliyeti’ş-şer‘iyye târih-i kitâbdan üç yüz altmış gün tamâmına değin bana kırk beş kıt‘a riyâlî kuruşa îcâr ve tesellüm edip ben dahi minvâl-i meşrûh üzre istîcâr ve teslîm eyledim dedikde, mukırr-ı mezbûr Mümine Hâtun’u ikrâr-ı meşrûhunda mütevellî-i mezbûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâlis min Cumâdelûlâ li sene tis‘a ve hamsîn ve elf. Şuhûdü’l-hâl: Hacı Ömer Çelebi b. ( ), Musa Çelebi b. el-Hâc Himmet, Mehmed Efendi b. Ahmed el-imâm, İbrahim Efendi [b.] …? Ömer Efendi, Hacı Murad Beşe b. Mehmed.