Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 250 Hüküm no: 276 Orijinal metin no: [65b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çavuş b. Mustafa’nın, evini aldığı borca karşılık Yeniçerilerin Doksan altıncı Cemaat Odasının nakit vakfına rehin vermesi Mahmiye-i İstanbul’da Mustafa Paşa kurbunda vâki‘ Molla Hüsrev mahallesi sükkânından olup bundan akdem maktûlen vefât eden merhûm Salih Paşa, selâm çavuşluğundan mağzûl olan İbrahim Çavuş b. Mustafa meclis-i şer‘-i hatîr-i lâzımü’t-tevkīrde dergâh-ı âlî -dâme merci‘an li’l-e‘âlî- yeniçerilerinin doksan altıncı cemâ‘atine mahsûs olan odanın odabaşı ve nukūd olan vakfına mütevellî olan işbu sâhibü’l-kitâb Osman Odabaşı b. Ebûbekir mahzarında tav‘an ikrâr ve i‘tirâf edip mezbûr Osman Odabaşı yedinden mâl-ı vakf-ı mezbûrdan olmak üzre yüz elli bir riyâlî kuruş i‘tirâz ve kabz ve mesârifine sarfile mâl-ı vakf-ı mezbûre zimmetimde deyn olduğundan gayrı yine mezbûr osman Odabaşı yedinden müşterâ ve makbûz mâl-ı vakf-ı mezbûrdan olmak üzre levn ve cins ve zirâ‘ı beynimizde ilm-i şer‘î ile ma‘lûm ve târih-i kitâbdan altı ay tamâmına değin müeccel çuka semeninden dahi yirmi riyâlî kuruş cem‘an yüz yetmiş riyâlî kuruş mâl-ı vakf-ı mezbûra zimmetinde vâcibü’l-edâ deynim olup meblağ-ı mezbûr mukābelesinde yedimde mülk ve hakkım olup mahalle-i mezbûrede vâki‘ bir tarafı Rıdvan Bey b. Abdullah mülküne ve bir tarafı Tüfenkçi Üstâd Mehmed mülküne ve bir tarafı tarîk-i âmma ve bir tarafı kendi mülküme muttasıl olup dört bâb tahtânî oda ve bi’r-i mâ’ ve kenîfi müştemil olan mülk menzilimi kâffe-i hukūk ve merâfıkı ile ba‘de’t-tahliye rehin vaz‘ ve teslîm edip ol dahi bi hasebi’t-tevliye irtihân ve kabz ve teslîm eyledi dedikde, mezbûrun ikrâr-ı meşrûhunu el-mukırrûn lehü’l-mezbûr Osman Odabaşı bi’l-muvâcehe tasdîk ve bi’l-müşâfehe tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Cumâdelûlâ li sene tis‘a ve hamsîn ve elf. Şuhûdü’l-hâl: Mustafa Efendi b. Mehmed el-İmâm-ı be mahalle-i Manisalı, Receb Halîfe b. Ebûbekir el-imâm, İbrahim b. Ebûbekir el-mu‘allim bi mekteb-i Kasımpaşa der-bevvâb, Şaban Halîfe b. Mustafa el-müezzin, Mehmed Beşe b. Hüseyin, Hüseyin Beşe b. Abdullah, Yahya Bey [b.] Zekeriya.