Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 257 Hüküm no: 286 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Davud’un menzilini Abraham v. Ağya’ya satması Mahmiye-i İstanbul’da hısnı ebvâbından Kumkapı kurbunda Süleyman Ağa mahallesinde sâkin Mustafa Efendi b. Davud meclis-i şer‘-i hatîr-i lâzimü’t-tevkīrde işbu râfi‘ül-kitâb Abraham v. Ağya nâm Ermeni zimmî muvâcehesinde tav‘an ikrâr ve i‘tirâf edip zikri âtî akdin sudûruna değin silk-i tasarruf ve yedimde münselik mülk ve hakkım olup mahalle-i mezbûrede vâki‘ bir tarafı Sinan Paşa Vakfı’ndan olup kendi tasarrufumda arsaya ve bir tarafı Ali Çelebi Vakfı’ndan olup tüccâr tâife ( ) nâm zimmî tasarrufunda menzile ve bir tarafı Mustafa Ağa b. ( ) mülküne ve bir tarafı tarîk-i âmma müntehî olup dâhiliye ve hâriciye muhtevî muhavvata-i dâhiliyesinde iki bâb fevkānî odayı ve bir matbahı ve bir kileri, bi’r-i mâyı ve kenîfi müştemil ve muhavvata-i hâriciyesinde dahi iki bâb fevkānî odayı ve ahûru ve kenîfi müştemil cemî‘ mülk menzilimi tevâbi‘ ve levâhıkı ve kâffe-i hukūk ve merâfıkı ile merkūm Abraham’a bin otuz kıt‘a riyâlî kuruşa tarafından îcâb ve kabûlü hâvî şürût-ı müfsideden ârî bey‘-i bâtt-ı sahîh ile [bey‘] ve teslîm edip ol dahi minvâl-i muharrer üzre iştirâ ve tesellüm ve kabz eylediğinden sonra semen-i mezbûr bin kıt‘a riyâlî kuruşu merkūm Abraham yedinden tamâmen ahz u kabz eyledim. Min ba‘d menzil-i mahdûd-ı mezbûr merkūm Abraham’ın mülk-i müşterâsı ve hakk-ı sırfı olmuşdur. Keyfe mâ yeşâ ve yahtâr mutasarrıf olsun dedikde, mukırr-ı mezbûrun ikrâr-ı meşrûhunda el-mukırrûn lehü’l-merkūm vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis aşer min Cumâdelûlâ li sene tis‘a ve hamsîn ve elf. Şuhûdü’l-hâl: Halil Efendi b. Mustafa el-kadı, Mehmed b. Mustafa Halîfe, Mehmed b. Davud, Mehmed Çelebi b. Osman, İbrahim b. Perviz, Halil Halîfe b. Musa el-müezzin, Abdüsselâm b. Osman, Yusuf b. Abdullah, Mehmed b. Hüseyin, İsa b. Ahmed.