Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 258 Hüküm no: 287 Orijinal metin no: [67b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Şaban’ın câriyesi Şakire bt. Abdullah’ın âzat edilmiş olduğuna karar verildiği İşbu açık kaşlı elâ gözlü, orta boylu Rûsiyyetü’l-asl müslimetü’l-mille Şâkire bt. Abdullah Efendi meclis-i şer‘-i hatîr-i lâzımü’t-tevkīrde mahrûsa-i Galata muzâfâtından kasaba-i Tophâne mahallâtından Cihangir mahallesinde sâkine Fâtıma bt. Şaban nâm hâtun mahzarında üzerine takrîr-i da‘vâ edip ben işbu mezbûre Fâtıma’nın câriye-i memlûkesi ve rakabesi olup mezbûre Fâtıma Hâtun bin elli sekiz Rebî‘ulevveli’nin altıncı gününde mahmiye-i İstanbul’da Mahmud Paşa Mahkemesi’nde nâib olan Mevlânâ Mustafa Efendi huzûrunda beni i‘tâk edip yedime hüccet-i şer‘iyye vermişiken hâlâ üzerime nâ-hak vaz‘-ı yed edip istirkâk edip suâl olunup üzerimden yed-i gāsıbı izâle ve sebîlim tahliye olunmağın taleb ederim dedikde, gıbbe’s-suâl mezbûre Fâtıma cevâbında fi’l-hakīka minvâl-i muharrer üzre işbu câriye bundan akdem karındaşım Mustafa Ağa’nın câriye-i memlûkesi olup zevcim Ali Reis’in izni yoğiken bir re’s câriyesi ile karındaşım mezbûr Mustafa Ağa’dan mukāyaza vechi üzre iştirâ ve tesellüm eyledikden sonra mevlâ-yı mûmâ-ileyh huzûrunda târih-i mezbûrede i‘tâk ve tahrîr eylemişdim. Lâkin bedel vermeksizin câriye benim olmamağla mezkûre Şâkire’nin i‘tâkı sahîh değil dedikde mezbûre Fâtıma’nın minvâl-i meşrûh üzre olan takrîri üzre bilâ izni’z-zevc mukāyaza ile mezkûr Şâkire’yi ahz ve dahi hakkında gāsıb ve mezkûre Şâkire hakkında mâlike olup câr-ı mülkünde i‘tâkı sahîh ve nâfiz (…) ikrâr mûcebince mezbûre Şâkire’nin ıtkına ve mezbûre Fâtıma mezbûre Şâkire üzerinden kasr-ı yedine hükm şer‘le hükm olunup, mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min şehri Rebî‘ilâhir li sene tis‘a ve [hamsîn] ve elf. Şuhûdü’l-hâl: El-Hâc Hüseyin b. Hasan, Ali Bey b. Sadık, Ali Bey b. Ahmed, Ebûbekir Beşe b. Çukadâr, İsa Bey [b.] Ahmed, Yahya Bey b. Zekeriya.