Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 93 Hüküm no: 11 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurd v. Aslan’ın mirası hususunda varislerinin kendi aralarında sulh olup birbirlerinin zimmetini ibra ettikleri Mahmiye-i İstanbul’da Yedikule kurbünde Mirahor mahallesinde sâkin iken hâlik olan Kurd v. Arslan nâm zimmînin verâseti zevce-i menkûhası Fori bt. Yasef nâm Nasrâniye’ye ve li-ebeveyn kız karındaşı Ayna ve li-üm karındaşları Bekler ve Yasef ibney Ellez ve li-üm kız karındaşı Fori bt. Ellez’e münhasıra olduğu ve tereke-i hâlik-i mezkûrun rub‘u zevcesi mezkûre Fori’ye ve nısfı li-ebeveyn kız karındaşı mezkûre Ayna’ya ve sümünü li-üm karındaşları mezkûrân Bekler ve Yasef ile li-üm kız karındaşı mezkûre Fori’ye isâbet eylediği şer‘an mütehakkık oldukdan sonra mezkûrân Bekler ve Yasef asâleten ve mezkûre Fori tarafından husûs-ı âti’l-beyânı ikrâra vekîl olup vekâleti mahalle-i mezkûre ahâlîsinden Papa Sart v. Papa Tavarsi ve Nikola v. Oruc nâm zimmîler şehâdetleri ile vekâleti sâbite olan Tanrıverdi v. Tavarsi vekâleten meclis-i şer‘-i hatîr-i lâzimü’t-tevkīrde hâlik-i mezkûrun terekesine vâzı‘atü’l-yed olan zevcesi mezkûre Fori mahzarında herbiri asâleten ve vekâleten tav‘an ikrâr ve i‘tirâf edip tereke-i hâlik-i mezkûreden olup mahalle-i mezkûrede vâki‘ bir tarafdan mezkûr ân Bekler ve Yasef mülklerine ve bir tarafdan Maşa ve Fori bintey Hudâverdi mülklerine ve bir tarafdan Mesip v. Yanaki mülküne ve bir tarafdan tarîk-ı âmma müntehî üç bâb fevkānî odayı ve altında bir bâb odayı ve bir ahırı ve su kuyusunu ve bir tahtânî sofayı ve cüneyneyi müştemil olup kıymeti seksen bin akçe takvîm olunan menzilden ve yine tereke-i hâlik-i mezkûrdan olup mecmû‘unun kıymeti yirmi bin akçe takvîm [3a] olunan esâs-ı beyt ve evânî-i nuhâsiyye ve gayr-ı nuhâsiyyeden ve yine tereke-i hâlik-i mezkûrdan olup kıymeti on bin akçe takvîm olunan Rusiyyetü’l-asl Sofya nâm Nasrâniye câriyeden irs-i şer‘le üçümüze intikāl eden sülüs hisse-i şâyi‘a-i şer‘iyyeden hâlik-i mezkûrun terekesine vâzı‘atü’l-yed olan zevcesi mezkûre Fori’den da‘vâ ve taleb edip beynimizde münâza‘ât-ı kesîre vukū‘undan sonra beynimize muslihûn tavassut edip mezkûre Fori ile bizi sülüs hisse-i şâyi‘amız mukābilesinde şerâit-i sulhu câmi‘-i [cemî‘-i] mevâni‘den ârî tehârüc-i şer‘î tarîkı üzere on iki bin fıddî râyic fi’l-vakt akçe üzerine sulh ettiklerinde biz dahi sulh-ı mezkûru kabûl ve bedel-i sulh olan meblağ-ı mezkûr on iki bin akçeden herbirimizin hissesine isâbet eden üçer bin akçeyi tereke-i hâlik-i mezkûrdan mezbûr Fori yedinden tamâmen ahz u kabz edip tereke-i hâlik-i mezkûr da‘vâsından zevcesi mezkûre Fori’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyleyip ba‘de’l-yevm tereke-i mezkûreye müte‘allika bi-vechin mine’l-vücûh ve sebebin mine’l-esbâb da‘vâ ve hakkımız kalmadı dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâlis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed Efendi b. Ali el-imâm, Muslı Çelebi b. Mehmed el-müezzin, İsmail Çelebi b. Yunus, İsmail Çelebi b. Mehmed, Mehmed Çelebi b. İbrahim ve gayruhüm mine’l-[hâzırîn.]