Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 97 Hüküm no: 17 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Piri Çelebi b. İbrahim’in vesayetinden dolayı zimmetinde bulunan parayı büluğ çağına erişen Rahime bt. Veli’ye iadesi Mahmiye-i İstanbul’da Emin Sinan mahallesi sâkinelerinden Rahime bt. Veli Bey nâm bikr-i bâliğa meclis-i şer‘-i hatîrde mahalle-i mezbûre sükkânından Pîrî Çelebi b. İbrahim mahzarında üzerine takrîr-i da‘vâ edip babam mezkûr Veli Bey mahalle-i mezbûrede sâkin olduğu hâlde vefât etdikde verâseti zevceleri İsmihan bt. Abdülkerim ve Ünzile bt. Receb nâm hâtunlara [ve] vâlidesi Rahime bt. Ca‘fer nâm hâtuna ve li-ebeveyn er karındaşı Mehmed ile kız karındaşı Zübeyde’ye ve bana münhasıra oldukdan sonra ben sagīre olduğum ecilden merkūm Pîrî Çelebi tesviye-i emrime savb-ı şer‘den vasî nasb olunmağla babam müteveffâ-yı mezbûrun cemî‘ terekesini verese-i mezkûrun asâleten ve merkūm Pirî Çelebi vesâyeten ma‘rifet-i kassâm-ı askerî ile kabz ve bey‘ edip hâsıl olan semenlerinden zevceleri mezbûretânın mehr-i [mü]’eccellerini ve sâir düyûn-ı müteferrika-i müsbetesini edâ ve masârıf-ı lâzımesini ihrâc ettiklerinden sonra bâkī kalan mertebeden verese-i mezbûrûn hisselerini ahz u kabz edip ve defter-i kassâm nâtık olduğu üzere benim hisseme isâbet eden on dört bin üç yüz seksen dokuz akçe hakk-ı mevrûsumu merkūm Pîrî Çelebi bi’l-vesâye ahz u kabz etmişidi hâlâ bâliğa ve reşîde olduğum ecilden meblağ-ı mezbûr on dört bin üç yüz seksen dokuz akçe hakk-ı mevrûsumu dahi merkūm Pîrî Çelebi bi’l-vesâye meblağ-ı mezbûru kabz ettiği günden i‘mâli ile hâsıl olan ribhini mezbûr Pîrî Çelebi’den taleb ederim suâl olunsun dedikde gıbbe’s-suâl mezbûr Pîrî Çelebi cevâbında fi’l-hakīka merkūme Rahime’ye babası müteveffâ-yı mezbûrdan intikāl eden meblağ-ı mezbûru bi’l-vesâye ahz u kabz ettiğimden sonra yevm-i mezbûrdan târih-i kitâba gelince meblağ-ı mezbûru vesâyeten i‘mâlim ile altı bin râyic [fi’l]-vakt akçe ribh hâsıl olmuşidi lâkin asl-ı mâl ve ribhden mecmû‘ olan yirmi bin üç yüz seksen dokuz akçeden on altı bin iki yüz akçesini nafaka-i mefrûza-i mu‘ayyenesine ve kisvesine sarf edip [4a] ve iki bin akçesini tereke-i müteveffâ-yı mezbûrdan bazı eşyâ acele ile bey‘ olunmakda sagīre-i mezbûreye zarar-ı beyyini olmağla re’y-i hâkimü’ş-şer‘ ile iki bin akçe kıymet takdîr olunup alâ mehlin bey‘ olunmak için bana teslîm olundukda yedimde olduğu hâlde emr-i hak ile harîk vâki‘ oldukda te‘addî ve taksîrimsiz benim mülküm ile ma‘an muhterik olup ve altı yüz akçesini dahi merkūme Rahime’ye takdîr olunan nafakanın hüccet-i şer‘iyye ve vesâyet hücceti ve bi’l-vesâye düyûn-ı müteveffâ-yı mezbûra erbabına teslîmde aldığım hücec-i şer‘iyyelerin rüsûmuna sarf edip bâkī asl-ı mâl-ı mevrûsu ile i‘mâlimden hâsıl olan ribhinden hâlâ yedimde ancak bin beş yüz seksen dokuz akçesi vardır deyu cevâb ve meblağ-ı mezbûr on dört bin üç yüz seksen dokuz akçenin altı bin akçesini ziyâde ribhi olduğunu inkâr edicek müdde‘iye-i mezbûre Rahime’den meblağ-ı merkūm altı bin akçeden ziyâde vasiyy-i mezbûrun makbûzu olduğunu mübeyyine beyyine taleb olundukda ityân-ı beyyine için mezbûr Rahime mehl-i şer‘î taleb etmekle merkūme Rahime imhâl olundukdan sonra merkūm Pîrî Çelebi’nin i‘tirâf-ı meşrûhu mûcebince yedinde olan bin beş yüz seksen dokuz akçenin merkūme Rahime’ye teslîmi için mezbûr Pîrî Çelebi’ye tenbîh birle mâ-hüve’l-vâki‘ bi’t-taleb ketb olundu. Fi’l-yevmi’l-hâmis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Salih Efendi b. Salih el-kādî, İsa Bey b. Ahmed el-muhzır, Hâcı Ca‘fer b. Abdullah el-muhzır, Çukadâr Osman Beşe ve gayruhüm mine’l-[hâzırîn.]