Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 103 Hüküm no: 26 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Mustafa’nın Anadolu Boğazhisarı’ndaki yalı ve bağını Mustafa Ağa b. İlyas Efendi’ye sattığı Mahmiye-i Galata’da Sultân Bayezid mahallesi sükkânından olup müteveffâ İsmail Efendi’nin kızı oğlu olan mefharü’l-akrân Ahmed Çelebi b. Mustafa meclis-i şer‘-i hatîr-i lâzimü’t-tevkīrde hâlâ mukābele-i süvâride başhalîfe olan mefharü erbâbi’t-tahrîr ve’l-kalem zübdetü ashâbi’t-takrîr ve’r-rakam sâhibü hâze’l-kitâb İbrahim Efendi b. İsa tarafından zikri âtî yalı ta‘bîr olunur mülk menzili tesellüme ve semenini teslîme vekîl olup vekâleti hasm-ı şer‘î-i câhid mahzarında kemâ-hüve nehcü’s-sübût şer‘an sâbite olan mefharü’l-emâsil Mustafa Ağa b. İlyas Efendi mahzarında tav‘an ikrâr ve i‘tirâf edip mukaddemâ ceddim müteveffâ-yı mezbûrun mülkü olup hâl-i hayâtında ve kemâl-i sıhhatinde bana hibe ve temlîk ve teslîm etmekle zikri âtî akdin sudûruna değin silk-i mülk-i sahîhimde münselik mülk ve hakkım olup Karadeniz Boğazı sâhilinde vâki‘ Yoros kazâsı muzâfâtından Anadolu Boğazhisarı mahallâtından merhûm ve mağfûrun-leh Sultân Süleyman Mescid-i şerîfi mahallesinde vâki‘ bir tarafdan hâlâ başmukābeleci olan umdetü’l-emâsil ve’l-a‘yân makbûlü’s-sudûr ve’l-erkân Hoca Mustafa Efendi b. Yusuf mülküne ve bir tarafdan merhûm Mustafa Bey veresesi mülküne ve bir tarafdan sâhil-i bahra ve bir tarafdan tarîk-ı âmma müntehî olup muhavvata-i dâhiliyyesi fevkānî üç bâb odayı ve iki sofayı ve bir kameriyeyi ve matbahı ve kenîfi ve su mahzenini ve cüneyneyi müştemil olup ve muhavvata-i hâriciyyesi iki bâb tahtânî ve iki bâb fevkānî odaları ve bir sofayı ve matbahı ve ahırı ve limanı ve kenîfi ve cüneyneyi ve menzil-i mezbûr hâricinde vâki‘ olan çeşmeden dâhil-i menzil-i mezbûra gelince olan mecrâ-i mâ’î kâffe-i hukūk ve merâfıkı ve âmme-i tevâbi‘ ve levâhıkı ile ve yine zikrolunan Hisâr bağlarında vâki‘ bir tarafdan şeyhülislâm müftî’l-enâm iken vefât eden merhûm ve mağfûrun-leh Bahayî Efendi veresesi bağlarına ve bir tarafdan Helvayî Hüseyin Bey bağına ve bazen Mücellâ bt. Abdülmennân nâm hâtun bağına ve bazen Mustafa Bey b. Mehmed bağına ve iki tarafdan tarîk-ı hâssa müntehî olan mülk bağı eşcâr-ı müsmire ve gayr-ı müsmiresi ile ve kâffe-i hukūk ve merâfıkı ve âmme-i tevâbi‘ ve levâhıkı ile müvekkil-i mûmâ-ileyh İbrahim Efendi’ye bi-safkatin üç bin beş yüz tâmmü’l-vezn riyâlî guruşa tarafeynden îcâb ve kabûlü hâvî bey‘-i bâtt-ı sahîhle bey‘ edip mûmâ-ileyh İbrahim Efendi dahi nefsi’çün iştirâ ve kabûl ettikden sonra semen-i merkūm üç bin beş yüz riyâlî guruşu müvekkil-i mûmâ-ileyh mâlından vekîl-i merkūm Mustafa Ağa yedinden bi’t-tamâm ve’l-kemâl ahz u kabz ve istîfâ edip cemî‘ menzil-i mezkûru ve bağ-ı meşrûhu vekîl-i mezkûr Mustafa Ağa’ya teslîm edip mezkûr Mustafa Ağa dahi bi’l-vekâle tesellüm ve kabz eyledi min-ba‘d cemî‘ menzil-i mezkûr ile cemî‘ [bağ] müvekkil-i mûmâ-ileyh İbrahim Efendi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde mukırr-ı mezbûru vech-i meşrûh üzere cârî [ve] sâdır olan kelimât-ı meşrûhasında mezkûr Mustafa Ağa dahi vekâleten bi’l-müvâcehe tahkīk ve bi’l-müşâfehe tasdîk edicek mâ-hüve’l-vâki‘ bi’t-taleb ketb olunup men lehü’t-taleb yedine def‘ olundu. Fi’l-yevmi’l-hâmis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Umdüte’l-emâcid ve’l-ekârim Hoca Mustafa Efendi b. Yusuf mukābele-i süvâri hâlâ, Mefharü’l-kuzât Mehmed Efendi b. Veli Efendi kâtibü’l-mübâya‘a, Salih Efendi b. Salih el-kādî, Ahmed Efendi b. Mehmed el-Kādî sâkin-i medîne-i Gümülcine be-vilâyet-i Rumeli, Ahmed Çelebi b. Abdurrahman sâkin-i Tophane, Mahmud Çelebi b. Mustafa el-müezzin, Mehmed Çelebi b. Mustafa el-müezzin, Yemenli Mehmed Çavuş, Osman Bey b. Memi el-cündi, Salih Bey b. Eyüb el-cündi, Yusuf Bey b. Abdullah el-cündi, Mefharü’l-emâsil Yusuf subaşı, Abd Mehmed b. ( ), Mehmed b. Musa, Mustafa b. Mehmed, Rıdvan b. Abdullah, Osman Bey el-cündi, İbrahim Efendi b. Ahmed el-imâm, Mustafa Çelebi b. Memi el-müezzin, Halil Çelebi el-hammâmî, Abdi Çelebi Halîfe mukābele-i süvâri, Mustafa Çelebi b. Şâkir mukābele-i [süvâri], Odabaşı Halil Çelebi, Osman Beşe b. Sevindik çukadâr ve gayruhüm.